"Çempionatın sonunu gözləmək lazımdı"

Ölkə kubokunun yarımfinal mərhələsinin cavab görüşündə “Neftçi” “Qarabağ”a 4:1 hesabı ilə məğlub olub.

“Football-plus.az” xəbər verir ki, matçdan sonra “ağ-qaralar”ın baş məşqçisi Miodraq Bojoviçin mətbuat konfransı keçirilib. Sizi monteneqrolu mütəxəssisin fikirləri ilə tanış edirik:



- Ağadaş Salyanski haqda fikriniz necədi?
- Biz onu əsas heyətə götürməyə cəhd edirik. Bu gün yaxşı oynadı, yaxşı ötürmələri var idi. Sevinirəm ki, "Neftçi"nin bu cür yetirməsi var və inanıram ki, faydalı olacaq.

- Rəqib oyunçular "Neftçi"nin asanlıqla cərimə meydançasına daxil olurlar. Müdafiədəki problemlər nə vaxt həll olunacaq?
- Bu tək müdafiəçilərlə bağlı məsələ deyil. Bütün komanda olaraq yetərincə yaxşı müdafiə olunmuruq. "Zirə" ilə görüşdəki nəticə də mənim üçün sürpriz oldu. Çünki meydanda çoxluq idik, amma uduzduq. Çempionatda 5 oyunumuz var. İstədiyimiz yeri tutmaq üçün əlimizdən gələni edəcəyik.

- Siz yeni təyin olunanda sosial şəbəkələrdə azarkeşlərə deyirdim ki, yaxşı baş məşqçisiz və vəziyyəti düzəldəcəksiz. Hər gün soruşurlar ki, necə olacaq? Mənim yerimdə olsanız, onlara hansı cavabı verərdiz?
- Çempionatın sonunu gözləmək lazımdı.