Kənd təsərrüfatı və qida sərgilərində KOB subyektləri üçün xüsusi stend qurulacaq

Əvvəlki illərdə olduğu kimi, bu il də KOB subyektlərinin, xüsusilə mikro və kiçik sahibkarların ölkəmizdə və xaricdə keçirilən müxtəlif ixtisaslaşmış sərgilərdə iştirakına dəstək göstəriləcək.

Kiçik və Orta Biznesin İnkişafı Agentliyinin (KOBİA) məlumatına görə, belə ki, KOBİA tərəfindən təmin ediləcək dövlət dəstəyi hesabına KOB subyektləri üçün sərgilərdə xüsusi stendlər qurulacaq. Bu stendlərdə məhsul və xidmətlərini təqdim edəcək KOB-lar tərəfindən hər hansı ödəniş edilməyəcək, sərgi ilə bağlı bütün xərclər dövlət tərəfindən qarşılanacaq. Məqsəd KOB subyektlərinin istehsal etdiyi məhsulları və xidmətləri geniş istehlakçı auditoriyasına tanıtmaq, satışına dəstək olmaqdır. KOB-ların sərgilərdə iştirakına dəstək mexanizminin əhatə edəcəyi sərgilər barədə sahibkarların məlumatlandırılması üçün əvvəlcədən KOBİA-nın www.smb.gov.az saytında, sosial şəbəkələrdəki hesablarında və mediada elanlar veriləcək.

15-17 may 2024-cü il tarixlərində Bakı Ekspo Mərkəzində keçiriləcək 17-ci Azərbaycan Beynəlxalq Kənd Təsərrüfatı (“Caspian Agro”) və 29-cu Azərbaycan Beynəlxalq Qida Sənayesi (“İnterFood Azerbaijan”) sərgilərində məhsul və xidmətlərini təqdim etmək istəyən KOB-lar 5 may 2024-cü il tarixinədək KOBİA-ya müraciət edə bilərlər. Sərgilərdə iştirak etmək istəyən KOB-lar müvafiq formanı doldurmaqla müraciət etməlidir: https://smb.gov.az/az/contact-form/exhibition-form/1 (“İştirak etmək istədiyiniz tədbir” hissəsində “Caspian Agro” qeyd edilməlidir).