Məcburi Köçkünlərin Sosial İnkişaf Fondu "Hermes-S" Mənzil-Tikinti Kooperativi ilə satınalma müqaviləsi bağlayıb.
MKT Cəbrayıl rayonunun Şükürbəyli kəndində 60 fərdi yaşayış evinin tikintisi ilə əlaqədar Fondun elan etdiyi tenderin qalibi seçilib.
Satınalma müqaviləsinin maliyyə dəyəri 9 208 672,39 manatdır.
İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Hermes-S" MKT 27 iyul 2011-ci ildə qeydiyyata alınıb. Nizamnamə kapitalı 100 manat olan şirkətin hüquqi ünvanı Yasamal rayonu, Əlibəy Hüseynzadə küçəsi, ev 53, mənzil 3-də yerləşir. MKT-nın qanuni təmsilçisi Kərimov Elçin Adil oğludur.
Açıq mənbələrdə MKT barəsində hər hansı məlumata rast gəlinmir. 9 milyonluq sifariş alan şirkətin adicə veb-səhifəsi də yoxdur.
Ötən il "Hermes-S" MKT evlərini sökdüyü vətəndaşların pulunu verməməklə gündəmə gəlib. Vətəndaşlar məhkəməyə müraciət edib. Məhkəmənin qərarı isə vətəndaşların xeyrinə olub.
2018-ci ildə Prezident Administrasiyasının şöbə müdiri Süleyman İsmayılov vətəndaşların quruma etdiyi şikayətlər haqqında yazdığı geniş məqalədə "Hermes-S" MKT-nın da adını qeyd edib. Məlum olub ki, vətəndaşların ən çox şikayət etdiyi tikinti şirkətlərindən biri də adıçəkilən MKT-dır.
Məcburi Köçkünlərin Sosial İnkişaf Fondunun "Hermes-S"lə 9 milyonluq müqavilə imzalayarkən bütün bunları nəzərə alıb-almadığı bəlli deyil.
Bu arada Fondun rəhbəri Mahir Abbaszadədir. O, eyni zamanda deputatdır. Mahir Abbaszadə 2020-ci ildə keçirilən parlament seçkilərində hakim Yeni Azərbaycan Partiyasının (YAP) namizədi kimi 121 saylı Laçın seçki dairəsindən mandat qazanmışdı.
YAP-ın cari ilin sentyabr ayında keçiriləcək növbədənkənar parlament seçkilərində irəli sürdüyü namizədlərin arasında isə Mahir Abbaszadənin adı yoxdur. (Qaynarinfo)