Qazaxıstanın paytaxtı Astanada Şanxay Əməkdaşlıq Təşkilatına üzv ölkələrin liderlərinin 24-cü genişləndirilmiş sammiti özişinə başlayıb.
Bir gün əvvəl Çinin sədri Si Cinpin Qazaxıstana dövlət səfərinə gəlib. O, sammitdə də iştirak edəcək.
Rusiya prezidenti Vladimir Putin iyulun 3-ü səhər Astanaya gəlib.
Qazaxıstanın paytaxtına ölkəsi təşkilatda müşahidəçi qismində iştirak edən Monqolustan prezidenti Uxnaaqiyn Xurelsux da gəlib.
Astanada keçiriləcək sammitdə ŞƏT-in Mərkəzi Asiya üzvlərindən Qırğızıstan prezidentləri Sadır Japarov və Özbəkistan prezidenti Şavkat Mirziyoyev iştirak edəcək. Tacikistanı kimin təmsil edəcəyi açıqlanmayıb.
Hindistanı Astanada baş nazir Narendra Modi deyil, xarici işlər naziri Subrahmanyam Caishankar təmsil edəcək. Pakistanı baş nazir Şehbaz Şərif təmsil edəcək. İrandan isə prezident səlahiyyətlərini icra edən Məhəmməd Moxber olacaq.
ŞƏT-də müşahidəçi qismində iştirak edən Belarusu prezident Aleksandr Lukaşenko təmsil edəcək.
Sammitin genişləndirilmiş formatı təşkilatın dialoq üzrə tərəfdaşı olan ölkələrin liderlərinin iştirakını nəzərdə tutur. Onların arasında Azərbaycan, Qətər, BƏƏ, Türkmənistan və Türkiyə var.
Azərbaycan və Türkiyədən prezidentlər İlham Əliyev və Rəcəb Tayyib Ərdoğan iştirak edəcək.
Beynəlxalq təşkilatlardan ŞƏT-in Astanada keçiriləcək sammitində BMT-nin baş katibi Antonio Quterreş, MDB-nin baş katibi Sergey Lebedev və KTMT-nin baş katibi İmanqali Tasmaqambetov, həmçinin İƏİT və Ərzaq və Təhlükəsizlik üzrə İslam Təşkilatının rəhbərləri iştirak edirlər.
“Çoxtərəfli dialoqun gücləndirilməsi: davamlı sülh və inkişafa səy” devizi altında keçirilən sammitin əsas gündəliyi aktual beynəlxalq və regional problemlərin həllində ŞƏT-in rolunun gücləndirilməsi olacaq.
Liderlər sabitliyi təmin etmək üçün ilk növbədə beynəlxalq ticarətə və iqtisadiyyata diqqət yetirmək niyyətindədirlər. Sammitdə həmçinin regional təhlükəsizlik, infrastruktur, enerji, ətraf mühit, səhiyyə, turizm, təhsil, rəqəmsallaşma, nəqliyyat və logistika məsələləri müzakirə olunacaq.
Sammitin yekunu olaraq müxtəlif sahələr üzrə 20-dən çox sənədin, o cümlədən aktual beynəlxalq və regional problemlərə dair ŞƏT-in mövqeyini və perspektiv tədqiqatlarını əks etdirəcək Astana Bəyannaməsinin, habelə “ŞƏT-in İnkişaf Strategiyası”nın qəbul edilməsi planlaşdırılır.
Sammitin gündəmindəki mühüm mövzulardan biri də terrorla mübarizə məsələsi olacaq. Tədbirdə “2025-2027-ci illər üçün terrorizm, separatizm və ekstremizmlə mübarizədə əməkdaşlıq Proqramı” və “ŞƏT-in 2024-2029-cu illər üçün narkotiklərlə mübarizə strategiyası” müzakirə olunacaq.
Belarusun ŞƏT-ə tamhüquqlu üzvlüyü ilə bağlı qərar gözlənilir.
Oxuməni.az
