Azərbaycan prezidenti İlham Əliyev bəyan edib ki, Ermənistanla sülh sazişinin əsas şərti ölkəsinə qarşı ərazi iddialarını özündə əks etdirən Ermənistan konstitusiyasının dəyişdirilməsidir.
Azərbaycan Prezident Aparatı Mətbuat xidmətindən verilən məlumata görə, Kanadanın Azərbaycandakı yeni səfiri Kevin Hamilton etimadnaməni İlham Əliyevə təqdim edib.
Söhbət zamanı Azərbaycanla Avropa İttifaqının 10 ölkəsi arasında strateji tərəfdaşlıq bəyannaməsi imzalandığını və bunların əksəriyyətinin İkinci Qarabağ Müharibəsindən (sentyabr-noyabr 2020-ci il) əvvəl olduğunu xatırladan İ.Əliyev deyib: “Ermənistanla Azərbaycan arasında sülh sazişi olmazsa, heç bir ölkə regiondakı fəallıq səviyyəsini müəyyə edə bilməz.
İşğal dövründə bəzi dövlətlər Ermənistanın işğalı ilə bağlı səssiz qaldı və Azərbaycanın ərazi bütövlüyünü dəstəkləmədi. İndi biz işğalçı Ermənistan ordusunu döyüş meydanında məğlub edib torpaqlarımızdan qovduqdan sonra bu dövlətlərdən bizim ərazi bütövlüyümüzü dəstəklədikləri barədə bəyanatlar eşidirik. Artıq kiminsə ərazi bütövlüyümüzü tanıyıb-tanımamasının bizim üçün əhəmiyyəti yoxdur. Bu bəyanatlar torpaqlarımız işğal altında olanda vacib idi.
Hal-hazırda Ermənistanla sülh prosesi vaxt aparacaq. Sülh sazişinin əsas şərti Ermənistan konstitusiyasına dəyişiklik edilməsidir. Çünki orada Azərbaycana qarşı ərazi iddiaları var və sülh sazişi konstitusiya dəyişikliyi olmadan imzalana bilməz. Əsas prinsiplər üzərində isə indidən razılaşmaq və saziş mətni üzərində işləmək mümkündür”.
