ABŞ Prezidenti Co Baydenin rəqibi Donald Trampla ilk debatda zəif çıxış etməsi və sonrakı tənqidlər demokratları “alternativ namizədlər” haqqında düşünməyə vadar edib.
Gundem.az bildirir ki, ABŞ mediasının iddialarına görə, Ağ Evin rəhbəri birinci xanım Cil Bayden, kiçik bacısı Valeri Bayden və dostu 85 yaşlı Ted Kaufmanla namizədlikdən geri çəkilib-çəkilməyəcəyini müzakirə edəcək. Qeyd olunub ki, demokratların başqa namizədlə seçki prosesini davam etdirməsi yalnız Baydenin yarışı öz istəyi ilə tərk etməsi şərtilə mümkündür.
“Onu kimin əvəzləyəcəyi isə daha çox “Bayden tərəfdarlarının” qərarından asılıdır. Demokratlar avqustda keçiriləcək qurultayda namizədlərini rəsmən elan edəcəklər”, - Qərb mediası qeyd edib. Bildirilib ki, Bayden artan təzyiqlərə müqavimət göstərə bilməsə və namizədlikdən imtina edərsə, onu əvəzləyəcək ən çox ehtimal olunan üç ad var.
Bunlardan biri vitse-prezident Kamala Harrisdir - Trampla Bayden arasındakı mübahisəli debatdan dərhal sonra keçirilən sorğuya görə, Demokrat seçicilərin əksəriyyəti Baydenin namizədliyini tərk edəcəyi təqdirdə Harrisin “ən yaxşı seçim” olacağını düşünür. Digər tərəfdən, Demokratlar arasında Harrisin kifayət qədər populyar olmadığını düşünənlər var.
Digər rəqib ola biləcək adlardan biri 56 yaşlı Kaliforniya qubernatoru Qavin Nyusomdur – O, hazırda Demokratlar Partiyasının “yüksələn ulduzu” kimi görünür. Nyusom Baydenin ən böyük dəstəkçilərindən biridir. Lakin düşünülür ki, Kaliforniyada evsizlik, yüksək vergilər və artan mənzil xərcləri kimi problemlər seçki prosesi zamanı Nyusomun qarşısına maneə kimi çıxa bilər. Bu da seçicilərdə müəyyən narahatlıq doğurur.
Digər adlardan biri Mişel Obamadır - Co Baydenin yaşına görə doğru namizəd olub-olmadığı ilə bağlı müzakirələr gedən zaman bəzi demokratlar tərəfindən adı önə çəkilən şəxslərdən biri idi. Lakin mart ayında namizəd olmayacağını açıqlayan Mişel Obama Amerika mətbuatına verdiyi müsahibələrdə mühüm rol almaq istəmədiyini də bildirib. Adı çəkilən digər siyasətçilərdən fərqli olaraq aktiv siyasətin ona uyğun olmadığını deyib. Buna baxmayaraq, Mişel Obama ABŞ-də kütlə tərəfindən sevilən ad olduğu üçün Demokrat Partiyasının mümkün seçimlərindən biridir.
Qeyd edək ki, ötən gün Virciniya ştatında baş tutan seçki mitinqində Respublikaçılar Partiyasının namizədi Donald Tramp artıq Baydenin yerinə keçmə ehtimalı olan namizədləri tənqid etməyə başlayıb. Sözügedən siyasətçilərin “Baydendən də zəif” olduğunu iddia edən Tramp bunları deyib: Kaliforniya qubernatoru Qavin Nyusom Kaliforniyanı belə idarə edə bilmir, heç kim vitse-prezident Kamala Harrisi istəmir, Mişel Obamanın sorğu nəticələri isə çox pisdir. (Sfera.az)
