Rusiya hərbi komandirləri indi Ukraynada sürətli manevrlər vasitəsilə əhəmiyyətli əməliyyat nailiyyətləri əldə etmək məqsədi daşıyan genişmiqyaslı hücuma başlamaqdansa, tədricən ardıcıl hücum əməliyyatlarına üstünlük verirlər.
Reyting.az-ın xəbərinə görə, bu barədə Müharibə Araşdırmaları İnstitutunun (ISW) yeni hesabatında bildirilir.
Hesabatda qeyd olunur ki, Rusiya lideri Vladimir Putin Ukraynaya qarşı müharibədə “qələbə nəzəriyyəsi” formalaşdırıb. Bu isə ukraynalıların uğurlu əks-hücum əməliyyatları keçirməsinə və “qalib gəlməsinə” mane olmaqla yanaşı, tədricən irəliləyişlərin qeyri-müəyyən müddətə davam edə biləcəyini göstərir.
“Görünür ki, Putin və Rusiya hərbi komandanlığı Rusiya qüvvələrinin təcrid olunmuş əməliyyat məqsədləri üçün illərlə olmasa da, aylar davam etməli ola biləcəyi reallığı etiraf etmək məcburiyyətindədirlər”, - deyə analitiklər bildirirlər.
ISW hesab edir ki, Putinə qarşı çıxmaq və müharibənin uzadılmasının qarşısını almaq üçün Qərb dövlətləri Ukraynanın əks-hücum əməliyyatlarına lazımi dəstəyi verməyə tələsməlidirlər.
İnstitutun xəbərdarlığında deyilir:
“Putin ümid edir ki, Rusiyanın Ukraynada sürünən uğuru Qərbi Ukraynanın qələbəsinin əlçatmaz olduğuna, ölkənin ərazi bütövlüyü və suverenliyinə dair güzəştlərin Ukrayna məğlubiyyətindən daha yaxşı olduğuna inandıracaq. Putin indi Ukraynanın tam təslim olmasından başqa heç nəyi qəbul etmək istəmir”.
Qeyd edək ki, Rusiya ordusu Ukraynada, xüsusən də Donbassın bəzi hissələrində irəliləməyə çalışır. “DeepState” analitikləri rusların Donetsk bölgəsində irəliləyə bildiklərini qeyd edirlər. Rusların irəliləməsi Evgenovkada, eləcə də Sokol və Novoaleksandrovka ərazilərində qeydə alınıb.
Almaniyanın Moskvadakı keçmiş səfiri və Almaniya Federal Kəşfiyyat Xidmətinin keçmiş vitse-prezidenti Rüdiger fon Fritşin sözlərinə görə, Vladimir Putin indi bu müharibəni bitirməkdə qətiyyən maraqlı deyil.
E. KAMAL
