BMT Təhlükəsizlik Şurasına (TŞ) sədrlik bir ay müddətinə Rusiyaya keçib.
Yeniavaz.com TASS-a istinadla xəbər verir ki, sonuncu dəfə Rusiya dünya təşkilatının əsas strukturunun işini 2023-cü ilin aprelində əlaqələndirib.
Rusiyanın rəhbərlik etdiyi Təhlükəsizlik Şurasının ilk iclası Nyu-York vaxtı ilə bazar ertəsi səhər keçiriləcək. İclas Təhlükəsizlik Şurasının qarşıdakı ay üçün iş proqramını təsdiq edəcək. Bundan sonra Rusiyanın daimi nümayəndəsi Vasili Nebenzya mətbuat konfransı keçirəcək, daha sonra BMT Baş Assambleyasına üzv dövlətlər üçün qapalı brifinq olacaq.
Rusiya sədrliyinin mərkəzi tədbirləri ayın ortalarında baş tutacaq və daha ədalətli, demokratik və davamlı dünya nizamının qurulmasına, Yaxın Şərq nizamlanmasına, habelə BMT-nin MDB, Şanxay Əməkdaşlıq Təşkilatı və KTMT ilə əməkdaşlığına həsr olunacaq..
Ümumilikdə, bir ay ərzində BMT Təhlükəsizlik Şurası iyirmiyə yaxın açıq iclas və qapalı məsləhətləşmələr keçirəcək.
Qeyd edək ki, BMT Təhlükəsizlik Şurası beş daimi üzv - Böyük Britaniya, Çin, Rusiya, ABŞ və Fransa da daxil olmaqla 15 üzvdən ibarətdir. Beş üzvdən hər birinin veto hüququ var. BMT Təhlükəsizlik Şurasının on qeyri-daimi üzvü Əlcəzair, Qayana, Malta, Mozambik, Koreya Respublikası, Sloveniya, Syerra-Leone, İsveçrə, Ekvador və Yaponiyadır. Dünya təşkilatının Nizamnaməsinə görə, Təhlükəsizlik Şurası sülhün və beynəlxalq təhlükəsizliyin qorunmasına cavabdehdir və BMT-yə üzv olan bütün ölkələr onun qərarlarına tabe olmağa borcludur.
Xatırladaq ki, Təhlükəsizlik Şurasında təmsil olunan dövlətlər öz işinə növbə ilə ingilis dilinin əlifba sırası ilə rəhbərlik edirlər. Bir ölkənin Təhlükəsizlik Şurasına sədrliyi bir təqvim ayı davam edir. İyun ayında bu funksiyaları Koreya Respublikası yerinə yetirib, avqustda isə Syerra-Leone Təhlükəsizlik Şurasının işinə rəhbərlik edəcək.

• Rusiya
• BMT
• Təhlükəsizlik Şurası