Pittsburq Universitetinin (ABŞ) mütəxəssisləri insan qanından enerji qəbul edən və tibbi məlumatlar toplaya bilən çip hazırlayıblar.
Medianews.az lenta.ru-ya istinadla xəbər verir ki, bu barədə tədqiqat “Advanced Materials” jurnalında dərc olunub.
Həkimlərin fikrincə, qanın elektrik keçiriciliyi bir çox sağlamlıq parametrlərini qiymətləndirmək üçün istifadə olunur. Ancaq bu məlumatları tez bir zamanda əldə etmək həmişə mümkün deyil. Alimlər insan qanından enerji alan və tibbi məlumatları toplayan çip yaradıblar.
Mütəxəssislərin “çip üzərində laboratoriya” adlandırdıqları cihazın ölçüləri təxminən 30 ilə 60 millimetrdir. Qurğu inteqrasiya olunmuş triboelektrik nanogenerator daxilində keçirici maddə kimi qandan istifadə edir. Sistem triboelektrikasiya yolu ilə mexaniki enerjini elektrik enerjisinə çevirə bilir.
Bu prosesə paralel olaraq, komanda qanın elektrik keçiriciliyini təyin etmək üçün əvvəlcədən müəyyən edilmiş yük şəraitində cihaz tərəfindən yaradılan gərginliyi təhlil edir. Mütəxəssislər əldə edilən nəticələri ənənəvi testlə müqayisə edərək, çipin dəqiq məlumat toplamağa imkan verdiyini təsdiqləyiblər.
Medianews.az
