Şirvan Apellyasiya Məhkəməsində yol qəzası zamanı piyadanın ölümündə və hadisə yerindən qaçmaqda təqsirləndirilən Bilal Bağırovun barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Habil Bəhmənovun sədrliyi ilə keçirilən prosesdə zərərçəkmiş şəxsin hüquqi varisi şahid ifadələri arasında ziddiyyət olduğunu və bu ziddiyyətin aradan qaldırılmasını istəyib.
O, Lənkəran Ağır Cinayətlər Məhkəməsinin 05 yanvar 2023-cü il tarixli qərarının ləğv edilərək ən ağır cəza verilməsini xahiş edib.
Qərara əsasən, zərərçəkmiş şəxsin hüquqi varisinin apellyasiya şikayəti qismən təmin edilib, Lənkəran Ağır Cinayətlər Məhkəməsinin çıxardığı qərar ləğv olunub. Belə ki, Cinayət Məcəlləsinin 263-1.3 və 264-cü maddələri təqsirliliyi sübuta yetirilmədiyinə görə onun barəsində cinayət təqibi üzrə icraata xitam verilib. “Mercedes Benz 609D Xüsusi T.Y” markalı avtomobillə cinayəti törətmiş şəxsin müəyyən edilməsi və onun cinayət təqibi məsələsinin həll edilməsi üçün qərar qanuni qüvvəyə mindikdən sonra iş materialları ibtidai araşdırmaya prosessual rəhbərliyi həyata keçirən prokurora göndərilməsi barədə qərar çıxarılıb.
İttihama görə, hadisə 28 mart 2022-ci il tarixdə saat 00:15 radələrində Salyan rayonunun Qarabağlı kəndi ərazisindən keçən hissəsində qeydə alınıb.
Belə ki, Şirvan şəhər sakini, 2023-cü i təvəllüdlü Bağırov Bilal Ramil oğlunun idarə etdiyi evakuator piyada P.Abbasbəylini vuraraq hadisə yerindən qaçıb. Piyada aldığı xəsarətlərdən hadisə yerində ölüb.
Hadisədən sonra Bilal Bağırov saxlanılıb.
Lənkəran Ağır Cinayətlər Məhkəməsi onun ictimai təhlükəli əməli anlaqsız vəziyyətdə törətməsinin sübuta yetirilmiş hesab olunması, hadisəni anlaqsız vəziyyətdə törətdiyinə görə Bilalın cinayət məsuliyyətindən azad edilməsi, barəsində tibbi xarakterli məcburi tədbirlər tətbiq olunmaqla, ona ümumi tipli psixiatriya stasionarında məcburi müalicə təyin edilməsi qərara alıb.
Kamal Məmmədov
