Ankara, 24 iyun, AZƏRTAC
Türkiyədə Qurban bayramı ilə əlaqədar qeyri-iş günləri elan olunmuş doqquz gün ərzində (15-23 iyun) ölkənin muzey və mədəni-tarixi irs obyektlərini ümumilikdə 1 111 957 nəfər ziyarət edib.
Bu barədə AZƏRTAC Türkiyənin Mədəniyyət və Turizm Nazirliyinin məlumatlarına istinadla xəbər verir.
İdarənin məlumatına görə, bayram günləri İzmir vilayətindəki qədim Efes şəhərinin xarabalıqları yerli sakinlər və qonaqlar arasında ən böyük marağa səbəb olub. Burada ziyarətçilərin sayı 130 min nəfərə çatıb.
Sonrakı yerləri Dənizli vilayətinin İerapolis qədim şəhəri (111 027 ziyarətçi) və Kapadokyadakı Görəmə açıq səma altında muzey (36 661 nəfər) bölüşür. Antalya, İstanbul, Trabzon və Şanlıurfadakı mədəni və tarixi məkanları da minlərlə turist ziyarət edib.
