Ədliyyə Nazirliyində yeni təyinat olub.
Ədliyyə naziri Fərid Əhmədov bununla bağlı əmr imzalayıb.
Əmrə əsasən, Seymur Səfərov nazirliyin İnsan resursları idarəsinin rəis müavini - rəis vəzifəsini icra edən təyin olunub.
Qeyd edək ki, Seymur Namaz oğlu Səfərov Vəkillər Kollegiyasının üzvüdür. Bu təyinatadək o, Vəkillər Kollegiyası Aparat rəhbərinin müavini vəzifəsində çalışıb.
Seymur Səfərov 1981-ci ildə anadan olub. O, 2004-cü ildə Bakı Dövlət Universitetinin Hüquq fakültəsini bakalavr, 2008-ci ildə isə magistr dərəcəsi üzrə bitirib.
Əmək fəaliyyətiə 2007-ci ilin mart ayında daxili işlər orqanlarında başlayıb, həmin ilin iyul ayından 2018-ci ilin oktyabr ayınadək fəaliyyətini Ədliyyə Nazirliyində davam etdirərək icra məmuru, Nazirliyin Kadrlar idarəsində və Təşkilat-nəzarət baş idarəsinin Xidməti araşdırmalar şöbəsində işləyib.
Polis leytenantı və kiçik ədliyyə müşaviri xüsusi rütbələri vardır.
Vəkilliyə qəbulla bağlı 2018-ci ildə keçirilən müsabiqədə uğur qazanaraq həmin ilin oktyabr ayından vəkillik fəaliyyətinə başlayıb, eyni zamanda Vəkillər Kollegiyası Rəyasət Heyətinin Aparat rəhbərinin müavini vəzifəsinə təyin edilib.
S.Səfərov, həmçinin 2020-ci ilin iyul ayından Mediasiya Şurasının üzvlüyünə qəbul olunaraq 2022-ci ilin dekabr ayına kimi mediator kimi fəaliyyət göstərib.
