Norveç, Finlandiya və İsveç üç ölkənin şimal ərazilərindən keçəcək hərbi nəqliyyat dəhlizinin yaradılması barədə razılığa gəliblər. Bu qərarı Norveçin Baş naziri Yonas Qar Störe isveçli həmkarı Ulf Kristersson və Finlandiya prezidenti Aleksandr Stubb ilə görüşlərindən sonra açıqlayıb.
Cənab Störenin sözlərinə görə, yeni dəhliz Norveç limanlarından İsveç və Finlandiya vasitəsilə hərbi personal və texnikanın sürətlə köçürülməsinə imkan verəcək. Üç ölkənin müdafiə nazirlərinə mülki aktorlarla əməkdaşlıqda dəhlizin yaradılması üzərində işləmək tapşırılıb. Dəhlizin uzunluğu və digər detallar verilmir.
NATO ölkələri Avropa və Rusiya arasında “böyük quru müharibəsi” baş verəcəyi təqdirdə ABŞ qoşunlarını və zirehli texnikalarını cəbhə xəttinə köçürmək üçün çoxsaylı “yer dəhlizləri” hazırlayır. Xüsusilə, qoşunların Balkanlardakı limanlar və ya Norveç, İsveç və Finlandiya vasitəsilə daşınması variantları nəzərdən keçirilir.
