Kreml Putinin Türkiyəyə planlaşdırılan səfərinin gecikməsinə aydınlıq gətirib

Rusiya Federasiyası və Türkiyə prezidentləri Vladimir Putin və Rəcəb Tayyib Ərdoğanın şəxsi görüşünün vaxtı hələ razılaşdırılmayıb, lakin liderlər telefonla tez-tez danışır.

APA-nın Moskva müxbiri xəbər verir ki, bunu Kremlin mətbuat katibi Dmitri Peskov bildirib.

“Görüşün tarixi hələ razılaşdırılmayıb. Səbəb o idi ki, bizdə prezident seçkiləri var idi, indi inauqurasiyaya hazırlıq gedir. Ərdoğanın da sıx proqramı var. Buna görə də, qrafikləri koordinasiya etmək bəzən çətin ola bilər. Amma bu o demək deyil ki, bizdə ən yüksək səviyyədə təmaslarda bir növ fasilə var. Prezidentlər bunu kifayət qədər tez-tez telefon danışıqları ilə kompensasiya edirlər”, - deyə Kreml sözçüsü vurğulayıb.

Peskov Putin və Ərdoğanın telefon danışıqları zamanı adətən hansı mövzuları müzakirə etmələri barədə də danışıb: "Biz bu danışıqların məzmunu barədə sizə mümkün qədər dolğun məlumat verməyə çalışırıq. Əlbəttə, söhbət əsasən ikitərəfli münasibətlərdən gedir. Biz iqtisadi əlaqələri inkişaf etdirmişik, bir çox birgə layihələrimiz var. Ölkələrimizin ətrafındakı vəziyyət isə təəssüf ki, arzuolunan deyil, ona görə də bu, həmişə müzakirəyə səbəb olur”.