Avropa Gimnastikası akrobatika mövsümünə yekun vurub.
Adıçəkilən qurum sosial şəbəkədəki səhifəsində Azərbaycandan olan Ağasif Rəhimov - Raziyə Seyidli qarışıq cütlüyündən də bəhs edən paylaşım edib.
“Vaxt uçur. Avropalılar üçün akrobatika yarışlarının tam ili başa çatdı”, aparıcı idmançıların çıxışlarından maraqlı məqamların fraqmentlərindən ibarət qalereyaya belə şərh yazılıb.
Qeyd edək ki, Azərbaycan millisi Gimarayeşdə (Portuqaliya) keçirilən dünya çempionatında tarixi nəticə əldə edib. Komandamız dünya çempionatında 8 medal qazanaraq yeni rekorda imza atıb, eyni zamanda ümumi sıralamada 3-cü yeri tutub.
Ağasif Rəhimov - Raziyə Seyidli qarışıq cütlüyü iki qələbə qazanıb (kombinə və balans hərəkətlərində), həmçinin tempdə üçüncü olublar. Kişilərdən ibarət Murad Rəfiyev - Daniel Abbasov dueti də kombinə və balans hərəkətlərində birinci olub və tempdə bürünc medal qazanıb.
Seymur Cəfərov, Abdulla Əl-Meşaihi, Rəsul Seyidli və Riad Səfərovdan ibarət kişilərdən ibarət qrup templə hərəkətlərdə bürünc medal qazanıb. Millimiz komanda yarışında da gümüş medala sahib çıxıb.
Ümumi hesabda Azərbaycan komandası yalnız Belçika (5-0-1) və Çindən (5-0-1) geri qalaraq ilk üçlüyə (4-1-3) daxil olub.
