İsrail İrandakı müdafiə sistemlərinə və raket istehsalı obyektlərinə ciddi ziyan vura bildi. Bu sözləri Yəhudi Dövlətinin baş naziri Benyamin Netanyahu Knessetin (parlament) qış sessiyasının açılışında deyib.
“Biz (İsrail - TASS qeydi) İranın müdafiə sistemlərinə və onun raket istehsal etmə qabiliyyətinə ciddi ziyan vurduq, sənaye müəssisələrinə hücum etdik və onlara real ziyan vurduq”, - deyə Netanyahu bildirib.
Onun sözlərinə görə, “[İsrailin] uzunmüddətli strategiyası İranın şər oxunu dağıtmaqdır” və həmçinin “Tehranın nüvə silahı əldə etməsinin qarşısını almaqdır”.

Baş nazirin çıxışı Knessetin saytında yayımlanıb.
Oktyabrın 26-da İsrail Müdafiə Qüvvələri “çoxsaylı davamlı hücumlara” cavab olaraq İran daxilindəki hərbi obyektlərə zərbələr endirib. İranın hava hücumundan müdafiə qüvvələrinin bəyanatına görə, İlam, Tehran və Xuzistan əyalətlərindəki hərbi hədəflərə hücum edilib, lakin dəyən ziyan məhdud olub.
Oktyabrın 1-də İran İsrailə geniş raket hücumu həyata keçirib. İslam İnqilabı Keşikçiləri Korpusu (İran Silahlı Qüvvələrinin elit bölmələri) hücumun HƏMAS Siyasi Bürosunun rəhbəri İsmayıl Haniyə və Hizbullahın baş katibi Həsən Nəsrullahın öldürülməsinə cavab olduğunu bildirib. İsrail ordusunun məlumatına görə, İsrail istiqamətinə 180-ə yaxın raket atılıb, onların əksəriyyətinin qarşısı alınıb.

aia.az
Tərcümə şöbəsi

• Netanyahu
• Müdafiə Sistemləri
• İsrail
• Raket Istehsalı
• İran