"Apple" şirkəti "iMac" stolüstü kompüterlərinin seriyasını yeniləyib.
İqtisadiyyat.az xəbər verir ki, bu barədə şirkətin saytında yayımlanan press-relizdə qeyd olunub.
Elan edilən monoblokların əsas xüsusiyyəti yeni M4 prosessoru ilə təchiz olunmalarıdır. İT nəhənginin nümayəndələri bildirib ki, yeni "iMac"lar 2021-ci ildə buraxılmış M1 prosessorlu modellərdən 1,7 dəfə daha sürətlidir. Kompüterlər minimum 16 GB operativ yaddaşa və "Apple Intelligence" neyron şəbəkəsinə dəstək verir.
Qurğular 4,5K təsvir ölçüsünə malik 24 düymlük Retina displey və 12 meqapiksellik veb-kamera ilə təchiz edilib. Opsional olaraq kompüterlər 4 ədəd Thunderbolt 4 portuna və nano teksturalı ekran örtüyünə malikdir. Modellər yaşıl, sarı, narıncı, çəhrayı, bənövşəyi, mavi və gümüşü olmaqla 7 rəngdə təqdim olunur.
Qeyd edək ki, "iMac"ın əsas versiyasının qiyməti 1299 dollardır. 24 GB operativ və 512 GB daxili yaddaşa malik ən yüksək modifikasiyanın qiyməti isə 1899 dollardır.
