Moskva və Pxenyan arasında əməkdaşlığın genişləndirilməsi Şimali Koreyaya silah və ordusunun fəaliyyəti ilə bağlı real məlumatlar almağa kömək edəcək.
Reyting.az-ın məlumatına görə, xarici KİV-lər analitiklərə istinadla yazır ki, Şimali Koreya Rusiyanın Ukraynaya qarşı müharibəsinə müdaxilədən fayda götürə bilər.
CNN-nin yazdığına görə, təcrid olunan və ağır sanksiyaya məruz qalmış Şimali Koreya rejimi onilliklərdir ki, böyük beynəlxalq münaqişədə iştirak etmir. Ölkə 1,2 milyon əsgəri ilə dünyanın ən böyük ordularından birinə malik olsa da, döyüş təcrübəsi yoxdur. Və Moskva ilə Pxenyan arasında əməkdaşlığın artması Şimali Koreyaya silah və ordusunun fəaliyyəti ilə bağlı real məlumatlar almağa kömək edə bilər.
“Xüsusi təyinatlılar döyüş təcrübəsi, hazırlığı olan və düşməninə nüfuzetmə təcrübəsi ilə qayıdacaqlar. Bu, onları daha təhlükəli edir. Düşünürəm ki, Kim Çen İn qoşunları təmin edir. Hökumətini saxlamaq üçün ona lazım olan resursları, habelə Koreya yarımadasında münaqişənin yaxınlaşdığına inanarsa, tətbiq edə biləcəyi dərsləri əldə edir”, - ABŞ Sakit Okean Komandanlığının Birgə Kəşfiyyat Mərkəzinin əməliyyatlar üzrə keçmiş direktoru Karl Şuster deyib.
Eyni zamanda, Cənubi Koreya ordusunun ehtiyatda olan general-leytenantı Çun İn Bum CNN telekanalına müsahibəsində rusların “hazırda çatışmayan işçi qüvvəsi alacaqlarını” bildirib. Bunun müqabilində Şimali Koreya pul, texnologiya və təcrübə qazanacaq.
Analitiklər proqnozlaşdırırlar ki, Pxenyan Rusiyaya kömək üçün adi qoşunlar yox, “xüsusi elitar qüvvə” göndərəcək.
“Uğur qazansalar, nəinki birbaşa döyüş təcrübəsi qazanacaqlar, həm də beynəlxalq səviyyədə tanınacaqlar. Ona görə də bu, bütün dünya üçün həqiqətən ciddi problemə çevrilə bilər. Şimali koreyalılar bunu vərdiş halına gətirsələr və təchizat bazasına çevrilsələr, necə olacaq? Yaxşı təlim keçmiş əsgərlər üçün belə bir yerləşdirmə potensialı böyük narahatlıq doğurmalıdır”, - Çun İn Bum bildirib.
E. KAMAL
