1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
"Şuşadan çıxanda 27 yaşım var idi, ömrümün ən gözəl, gənc çağında doğma yurdumdan didərgin düşdüm, indi 58 yaşımda qayıdıram öz elimə, obama".
Bunu Oxu.Az-a açıqlamasında bu gün Şuşa şəhərinə köç edən keçmiş məcburi köçkün Gültəkin Babayeva deyib.
O qeyd edib ki, bu günü yaşamaq həmişə onun arzusu olub və həyəcanla gözləyib:
"Gecəni həyəcandan yata bilməmişik. İllərlə bu günü gözləmişik. Nəhayət, illər sonra gözümüzü öz doğma Şuşamızda açacağıq. Çox xoşbəxtik.
Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!"
Qeyd edək ki, bu gün Şuşa şəhərinə növbəti köç karvanı yola salınır. Bu mərhələdə 16 ailə (60 nəfər) öz doğma yurduna köçürülür. Bununla da Şuşa şəhərində ümumilikdə 220 ailənin (823 nəfərin) məskunlaşması təmin edilib.
Aytac Qasımova
