Futbol üzrə milli komandamızın baş məşqçisi Fernandu Santuş millimizin qarşıdakı 2 oyun üçün heyətini açıqladı. Təcrübəli mütəxəssis demək olar ki, kiminsə yoxluğu ilə bizə sürpriz yaşatmadı. Amma bir nəfər var ki, siyahıda adının varlığı ilə bizi cüzi təəccübləndirdi. Söhbət "Neftçi"nin sabiq kapitanı Emin Mahmudovdan gedir. Yeri gəlmişkən, ağ-qaraların hazırkı kapitanı Ramil Şeydayev də heyətdədir. Amma bu dəfə söz verib, millidə kapitan kim olsa, onun sözündən çıxmayacaq.
Məsələdən hali olmayan oxucular üçün bildirim ki, Mahmudovun adı "Neftçi"nin son turda "Sumqayıt"la matçında ehtiyat oyunçular skamyasında belə yox idi. Səbəb də göstərildi ki, zədəlidir. "Flaqman"ın baş məşqçisi Roman Qriqorçuk şəxsən mənim sualıma verdi bu cavabı. "Emin zədəlidir, nə vaxt meydanlara qayıdacağı da məlum deyil. Bir müddət oynamayacaq".
Səfərdə Estoniya, evdə Slovakiya ilə qarşılaşacaq millimizdə baş məşqçi Fernandu Santuş isə Eminlə bağlı verilən suala siyasətdən kənar, dümdüz cavab verdi:
"Tibbi heyətdən soruşmuşam, oyunçunun heç bir zədəsi yoxdur. Emin Mahmudov çox keyfiyyətli oyunçu olduğu üçün milliyə dəvət edirəm".
Bəli, bu qədər. Sadə.
Qulağıma kimsə pıçıldayır ki, Emin bu gün "Neftçi"nin "Kəpəz"ə qarşı matçında da oynamayacaq. Bilmək olmaz, bəlkə də heyətdə olar.
İndi keçək əsas suala, daha doğrusu suallara.
Emin Mahmudov zədəlidir? - Zədəlidirsə, niyə milliyə çağırılır?
Emin Mahmudovun zədəsi yoxdur? - Yoxdursa, niyə Neftçidə zədəlidir adıyla oynamır?
Fernandu Santuş yalan deyir? - Fakt, adam deyir ki, tibbi personaldan zədəli olmadığı barədə məlumat almışam.
Roman Qriqorçuk yalan deyir? - O da tibbi personalın sözünü deyir, özü əlini Eminin alnına tutub demir ki, qızdırması var...
İndi siz deyin, cənab seyidlər. Bu paradoksu necə başa düşək?
"Bakının necə gözəl olduğunu söylədim, ailəm daha da həyəcanlandı" - Müsahibə
Millimizin hazırlıq planı bəlli oldu
Fernandu Santuş: "Kimisə bağışlayacaq adam deyiləm"
Millimizin Estoniya və Slovakiya ilə oyunlar üçün heyəti açıqlanıb
U-15 millimiz sonuncu matçına çıxacaq
