Bakı, 3 oktyabr, AZƏRTAC
Türk Mədəniyyəti və İrsi Fondu tərəfindən nəşr olunan görkəmli qazax yazıçısı və ictimai xadim Kemel Tokayevin Azərbaycan dilinə tərcümə edilmiş “Xüsusi tapşırıq” kitabının X Bakı Beynəlxalq Kitab Sərgisi çərçivəsində təqdimatı olub.
Bu barədə AZƏRTAC-a AMEA-dan məlumat verilib. Tədbirdə çıxış edən Türk Mədəniyyəti və İrsi Fondunun prezidenti Aktotı Raimkulova müharibə əleyhinə qələmə alınan, insanları sülhə səsləyən “Xüsusi tapşırıq” kitabının “Türk ədəbiyyatının inciləri” seriyasından olduğunu bildirib. O, Kemel Tokayevin yazıçılıq fəaliyyəti ilə yanaşı, jurnalistika ilə də məşğul olduğunu, publisistik əsərlərində Qazaxıstanın mühüm mədəni və sosial məsələlərini işıqlandırdığını deyib.
Qazaxıstan Prezidentinin müşaviri Malik Otarbayev Kemel Tokayevin qazax ədəbiyyatında detektiv janrının təməlini qoyduğunu söyləyib: “O, hər bir əsərini arxivdəki məlumatlara əsaslanaraq yazıb. Yaşanan hadisələri qələmə alaraq tarixdə unudulmaz iz qoyub”.
AMEA-nın prezidenti akademik İsa Həbibbəyli Kemel Tokayevin kitabının Azərbaycan dilində nəşr olunmasının əhəmiyyətini vurğulayıb. Yazıçının türk mədəniyyətinin və söz sənətinin inkişafına böyük töhfələr verdiyini qeyd edib. Akademik İsa Həbibbəyli bu kitabın beynəlxalq sərgidə təqdimatının türk dövlətləri arasında inteqrasiya əsaslı tərəfdaşlıq əlaqələrinin inkişafına töhfə olduğunu söyləyib. Qeyd edib ki, “Xüsusi tapşırıq” kitabı yerli oxuculara qazax ədəbiyyatının böyük siması olan Kemel Tokayevin yaradıcılığı ilə tanış olmağa imkan yaradacaq.
Tədbirdə çıxış edən Azərbaycan Yazıçılar Birliyinin sədri Xalq yazıçısı Anar, Birliyin katibi Xalq yazıçısı Çingiz Abdullayev, Azərbaycanda Atatürk Mərkəzinin direktoru akademik Nizami Cəfərov, Milli Məclisin İctimai birliklər və dini qurumlar komitəsinin sədri Fazil Mustafa kitabın Azərbaycan dilində nəşr olunmasını yüksək qiymətləndiriblər.
Kitabın layihə rəhbəri və ön sözün müəllifi Türk Mədəniyyəti və İrsi Fondunun prezidenti Aktoti Raimkulova, tərcüməçisi Rǝbiqə Nazimqızı, redaktoru isə Əkbər Qoşalıdır.
