2024-cü ildə keçirilən beynəlxalq oyunlarda ən çox qol vuran futbolçuların siyahısı açıqlanıb.
İdman.biz xəbər verir ki, İFFHS-in tərtib etdiyi cədvəldə milli komanda və qitəmiqyaslı klub turnirlərində ən azı 8 qol vuranlar yer alıb.
Siyahıya “Olimpiakos”un mərakeşli hücumçusu Ayub Al-Kaabi başçılıq edir. 15 qol vuran afrikalı klubda 11, yığmada 4 dəfə fərqlənib.
“Əl-Sədd”in qətərli forvardı Akram Afif ikinci, “Bavariya”nın ingilis ulduzu Harri Keyn üçüncüdür. Onların hər ikisi 14 dəfə fərqlənib.
“Qarabağ”ın bombardiri Olavio Juninyo avrokuboklarda ümumilikdə 9 qol vursa da, siyahıya daxil edilməyib. Buna təsnifat mərhələlərinin qollarının nəzərə alınmamağı səbəb olub. Əsas raundlarda 3, təsnifatda 6 dəfə fərqlənən braziliyalı bu üzdən cədvəldən kənar düşüb.
Qeyd edək ki, yalnız 19 futbolçu ilin ilk 9 ayında 8 və ya daha çox qol vurmağı bacarıb.
İdman.biz
