Bakı, 30 sentyabr, AZƏRTAC
"Zəfər" Şəhid Ailələrinə Dəstək İctimai Birliyi və Azərbaycan Respublikasının Dövlət Turizm Agentliyi tərəfindən Vətən uğrunda canlarında keçən qəhrəman şəhidlərimizin övladları üçün Qobustanda yerləşən Palçıq Vulkanları Turizm Kompleksinə ekskursiya təşkil edilib.
AZƏRTAC xəbər verir ki, ekskursiya zamanı bələdçilər məktəbli şəhid övladlarına ölkəmizdəki palçıq vulkanları barədə ətraflı məlumat veriblər. Ekskursiya iştirakçıları kompleks ərazisində yerləşən Təbiət tarixi sərgi zalında Azərbaycan və dünya faunasına aid heyvan skeletləri və tarixi eksponatlarla tanış olublar.
İştirakçılar üçün rəngkarlıq, dulusçuluq və boyama incəsənət sahələri üzrə master-klaslar təşkil olunub.
Ekskursiyanın yekununda iştirakçılara hədiyyələr verilib.
