Yalnız Elçin Məsimov qalmaqala səbəbkar oldu - HAKİMLƏRİN MÜHAKİMƏSİ

28 sarı vərəqənin qeydə alındığı turu nə hədsiz kobud saymaq olar, nə də çox səliqəli.

Xüsusən də “Səbail” – “Sabah” oyunu pis mənada fərqləndi. Kamal Umudlu futbolçulara 11 sarı vərəqə göstərdi ki, bunların 7-i “dənizçilər”in, 4-ü “bayquşlar”ın payına düşdü. Sırf hakim qərarlarından söhbət gedirsə, Elçin Məsiyev Tovuzda Roderik Millerə qarşı kobud oynayan Ramon Maçadonu meydandan qovmamaqla həftəboyu davam edən diskussiyaların mərkəzində dayandı. Düzdü, AFFA Hakimlər Komitəsinin sədri Frank De Blekere sonradan ona haqq qazandırdı.

Qarabağ – Neftçi, ƏLİYAR AĞAYEV
Azərbaycan derbisində ədaləti FİFA referisi təmsil etdi. Tribunalarda yaşanan rəqabət meydandakından gərgin idi. Elə bu üzdən Ağayevin işi o qədər də çətin olmadı. Nə futbolçuların sözü çəp gəldi, nə də dava düşdü. “Qarabağ”ın əzici üstünlüyü şəraitində keçən oyunda Silva ehtiyatsızlıqdan Bauerə çırpılıb yerə yıxdığına, Romao Kuça kobud müdaxilə etdiyinə görə cəzalandı. Təbii ki, burda hansısa haqsızlıqdan söhbət getmir. Oyun ərzində futbolçuların, ardından baş məşqçilərin hakimdən narazı qalmadığı bəllidi. Həmçinin azarkeşləri qəzəbləndirən qərar da görmədik. Belədə referinin vəzifəsinin öhdəsindən qüsursuz gəldiyini deyə bilərik.

Sumqayıt – Zirə, İNQİLAB MƏMMƏDOV
Oyunun maraqlı keçmədiyini reportajda qeyd etmişdik. Bunun fonunda oyun ərzində xeyli qayda pozuntusuna və kobudluğa şahidlik etdik. Məmmədov ədaləti təmsil etmək üçün həm şifahi, həm də rəsmi xəbərdarlıqdan çəkinmədi. Vüqar Mustafayevin cərimə meydançası daxilində topa əllə müdaxiləsinə görə penalti təyin olunması da doğru idi. Meydan sahiblərinin üç, qonaqların iki “sarı” ilə üzləşdiyi qarşılaşmada Rəşad Sadıqovun emosionallığıyla diqqət çəkdi. “Zirə”nin baş məşqçisi hakimin oyunu tez-tez dayandırmasına etirazını laysmana bildirdi. Amma buna görə İnqilab bəyi qınaya bilmərik. Çünki referi futbolçuların qayda pozuntusuna göz yuma bilməzdi.

Kəpəz – Şamaxı, CAVİD CƏLİLOV
Turun açılış matçı Cavid Cəlilovun rəhbərlik etdiyi hakimlər briqadasına tapşırılmışdı. Qonaqlar ilk dəqiqələrdən mübarizə əzmini ortaya qoysalar da , hansısa aqressivliyin şahidi olmadıq. Oyun yetərincə maraqlı alındı. Hakimin çiynindəki “yük” də yüngül oldu. Cavid bəyin qərarları və mövqe seçimi doğru idi. Referi futbolçulara 4 sarı vərəqə göstərdi ki, bunların hamısı haqlı idi.

Turan Tovuz – Araz-Naxçıvan, ELÇİN MƏSİYEV
Oyunun gərgin keçəcəyi əvvəldən bəlliydi. Ona görə ki, komandalar yüksək yerlər uğrunda mübarizə aparır. 13-cü dəqiqədə bəlkə də oyunun sonrakı axarına təsir göstərən hadisə baş verdi. Maçado topu başla uzaqlaşdırmaq istəyən Millerin üzərinə açıq ayaqla getdi. Yerdə qalan panamalı müdafiəçi dərhal əvəzlənməsini istədi. Hakim isə Maçadoya yalnız sarı vərəqə göstərdi, halbuki meydandan qovmaq da olardı. Qərar müzakirələrə səbəb oldu və birmənalı qarşılanmadı. FİFA referisi qarşılaşmanı qənaətbəxş idarə etmədi.

Səbail – Sabah, KAMAL UMUDLU
Kamal Umudlu məhsuldar qarşılaşmanı pis idarə etmədi. Komandaların sürətli və açıq oynamasına şərait yaradan hakim 11 futbolçuya, bir də rəsmi şəxsə sarı vərəqə göstərdi. Bununla da Umudlu “oyunun ipi”ni əlində saxlamağa çalışdı. VAR-a baxandan sonra “Sabah”ın vurduğu qolu qeydə almaması da doğru qərar idi. Bununla da gənc hakim böyük narazılığın qarşısını aldı. Hər halda, onun başçılıq etdiyi hakimlər briqadasının nəticəyə təsir edən səhvini izləmədik.