27 sentyabr Anım Günü ilə əlaqədar Şəkidə Vətən müharibəsi şəhidlərinin xatirəsinə həsr olunmuş rəsmi anım tədbiri keçirilib.
Avtosfer.az xəbər verir ki, Şəki Şəhər İcra Hakimiyyətinin rəhbərliyi, hüquq mühafizə orqanlarının rəhbərləri, ictimaiyyətin nümayəndələri ölkəmizin ərazi bütövlüyü uğrunda canından keçmiş şəhidlərimizə dərin ehtiram əlaməti olaraq əvvəlcə Şəhidlər xiyabanını, daha sonra Şəhidlərin Xatirə Kompleksininin yerləşdiyi məzarlığı ziyarət ediblər, şəhid məzarları önünə əklil və gül dəstələri qoyub, şəhidlərin xatirəsini ehtiramla yad ediblər.
Anım tədbiri Şəhidlərin Xatirə Kompleksinin qarşısında davam edib. Tədbirdə Şəki Şəhər İcra Hakimiyyətinin başçısı Elxan Usubov, şəhid anası, “Vətən naminə” Şəhid Ailələrinə Dəstək İctimai Birliyinin Şəki şöbəsinin sədri Gülnarə Mustafayeva, şəhid anası, Əməkdar müəllim Dursun Cavadova, 2-ci Qarabağ müharibəsi iştirakçısı, ehtiyatda olan mayor Mehman Əbdürəyimov çıxış ediblər.
Çıxışlarda bildirilib ki, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq Prezident cənab İlham Əliyev hər il sentyabr ayının 27-nin Azərbaycan Respublikasında Anım Günü kimi qeyd olunması ilə bağlı Sərəncam imzalamışdır.
Vurğulanıb ki, 27 sentyabr doğma torpaqlarımızı işğaldan azad etmək, ölkəmizin sərhədlərini təxribatlardan qurtarmaq iradəmizin güclü təməli, Qarabağda erməni hökmranlığını başa çatdıracaq hərbi-siyasi gücümüzün ortaya qətiyyətlə qoyulduğu, milli ruhumuzun, milli həmrəyliyimizin öz sözünü kəskinliklə dediyi şərəfli bir tarixdir.
Bildirilib ki, Prezident, Ali Baş Komandan İlham Əliyevin rəhbərliyi altında 44 günlük müharibədə qazandığımız Zəfər xalqımızın minlərlə qəhrəman övladının canı-qanı bahasına, əsgər və zabitlərimizin, cəbhəyə könüllü gedən vətənpərvər gənclərimizin igidliyi nəticəsində tariximizə yazılmış şanlı salnamədir.
Qeyd olunub ki, son 30 ildə olduğu kimi, Vətən müharibəsindən sonra da Azərbaycanın müstəqilliyi uğrunda canını fəda etmiş şəhidlərimizin ailələrinə və müharibə iştirakçısı olmuş şəxslərə diqqət və qayğı ölkəmizdə yüksək səviyyədədir.
Saat 12:00-da tədbir iştirakçıları Vətən müharibəsi şəhidlərinin əziz xatirəsi bir dəqiqəlik sükutla yad ediblər.
Qeyd edək ki, “Anım Günü” ərəfəsində Şəki Şəhər İcra Hakimiyyətinin rəhbərliyi, hüquq mühafizə orqanlarının rəhbərləri, ictimaiyyət və gənclər təşkilatlarının nümayəndələri tərəfindən şəhidlərin ailələri ilə görüşlər keçirmiş, onların məzarlarını ziyarət edilmişdir, şəhid ailələrinə maddi köməklik göstərilmişdir, şəhər ərazisində binaların eyvanlarında dövlət bayraqları və “Anım Günü” ilə bağlı bannerlər asılmış, məscidlərdə şəhidlərin ruhuna dualar oxunmuşdur.
Sentybarın 27-də rayon ərazisində şəhidlərinin xatirəsinə həsr olunmuş ağacəkmə aksiyası keçirilib.
