Xocavəndin Qaradağlı kəndində ermənilərin törətdiyi faciə zamanı itkin düşən Quliyev Mirzəli Müslət oğlunun nəşinin qalıqları 32 ildən sonra doğma Qaradağlı kəndinin Şəhidlər xiyabanında torpağa tapşırılıb.
Bizim.Media xəbər verir ki, Mirzəli Quliyev 1952-ci ildə Qaradağlı kəndində dünyaya göz açıb.
Doğma kəndinin müdafiəsi zamanı sona qədər döyüşüb. Erməni hərbi birləşmələrinin kəndi işğal etdiyi zaman Mirzəli Quliyev də əsir götürülüb və onun taleyindən ötən müddətdə heç bir məlumat olmayıb. Torpaqlarımız işğaldan azad ediləndən sonra onun nəşinin qalıqları Ağdam-Xocavənd rayonlarının sərhədində aşkarlanaraq şəxsiyyəti dəqiqləşdirilib.
Şəhidin nəşi bu gün doğma kəndi Qaradağlıya gətirilib, vida mərasimi olub, cənazə namazı qılınıb, şəhidlərin ruhuna dualar oxunub.
Dəfn mərasimində şəhidin ailə üzvləri, yaxınları ilə yanaşı, rayon rəhbərliyi, hüquq-mühafizə orqanlarının əməkdaşları, kənd sakinləri iştirak ediblər.
Bizim.Media
