2-ci Şuşa Qlobal Media Forumunun qonaqları Azərbaycanın görkəmli sənət xadimləri - şair Xurşidbanu Natəvan, opera müğənnisi Bülbül və bəstəkar Üzeyir Hacıbəylinin heykəllərinin yerləşdiyi Şuşa şəhərinin mərkəzi meydanına səfər ediblər. Şuşa Şəhəri Dövlət Qoruğu İdarəsinin nümayəndələri qonaqlara bu heykəllərin və şəhərin tarixi irsi barədə dolğun məlumat veriblər.
Bundan sonra iştirakçılar Xurşidbanu Natəvanın evini və Xan qızı bulağını, Bülbülün ev-muzeyini, Yuxarı Gövhərağa məscidini, Qazançı kilsəsini ziyarət ediblər. Sonra onlar Cıdır düzündən açılan mənzərəni seyr edərək, Şuşanın işğaldan azad edilməsindən sonra şəhərdə həyata keçirilən genişmiqyaslı bərpa və quruculuq işləri haqqında məlumat alıblar. Forum iştirakçıları, həmçinin Dövlət Xidmətləri Mərkəzi ilə də tanış olublar.
Sözügedən ekskursiyalar Şuşanın zəngin tarixi və mədəni irsini, eləcə də şəhərin yenidənqurma işlərini nümayiş etdirmək məqsədilə təşkil edilib.
