Rumıniya millisinin baş məşqçisi Edvard Yordenesku AÇ-2024-ün 1/8 finalında Niderland yığması ilə oyun ərəfəsində gözləntilərini paylaşıb.
Arena.az UEFA-nın mətbuat xidmətinə istinadən, rumın mütəxəssisin bu barədə fikirlərini təqdim edir:
“Əgər siz qarşınızda olan tarixlə oynayırsınızsa, siz can qoymağa hazırsınız. Heç bir oyun asan deyil, xüsusən də sizi 1/4 finala apara biləcək oyun. Sabah (artıq bu gün – redaktorun qeydi) Niderland favorit olacaq. Onların inanılmaz oyunçuları var, amma bizim öz güclü tərəflərimiz var.
1/4 finala yüksəlmək nağıla bənzərdi. Bunu sözlə ifadə etmək çətindir. Bizim güclü, intizamlı, mütəşəkkil və qətiyyətli olmağımız vacibdir, onda hər şey bizim xeyrimizə nəticələnə bilər.
Tarixi oyuna çıxacağıq. Bizim tarix yazmaq və Avropa çempionatındakı ən yaxşı çıxışımıza müvafiq olmaq imkanımız var. Bu, bizim ilhamımızdır və bu, çoxdan istədiyimiz və haqqında xəyal etdiyimiz bir andır.
Mən, məşqlərin ağırlaşdığını deməzdim, bəlkə də peşəkar nöqteyi-nəzərdən daha yüksək səviyyədə olduğunu deyərdim. Məqsədim onları (komanda heyətini nəzərdə tutur – redaktorun qeydi) daha diqqətli olmağa sövq etmək, bütünlüklə fəda olmalarını təmin etməkdir. Onların münasibətini, zehniyyətini qiymətləndirmək və bu anın əhəmiyyətini tam dərk etdiklərinə əmin olmaq istədim. Bu, mənim üstünlük verdiyim məqam idi.
Avropa çempionatından əvvəl demişdim ki, səhv gedən hər şeyə görə məsuliyyəti öz üzərimə götürəcəyəm, amma yaxşı gedən hər şey üçün məsuliyyəti öz üzərlərinə götürməlidirlər. Mən onlara, sabah nəticənin necə olacağının öz ixtiyarlarında olduğunu deməyə çalışmadım, amma bu, mənim onlara çağırışım idi. Əminəm ki, onlar bunu başa düşürlər və meydanda onların qarşılığını səbirsizliklə gözləyirəm”, deyə Edvard Yordenesku komandasına inamını vurğulayıb.
Xatırladaq ki, AÇ-2024-ün 1/8 final mərhələsinin Rumıniya – Niderland oyunu bu gün, iyulun 2-də Münhenin “Alyans Arena” stadionunda keçiriləcək. Hakim oyunu Bakı vaxtı ilə saat 20:00-da başladacaq.
