Bakı, 2 iyul, AZƏRTAC
Filippin prezidenti Ferdinand Romualdez Markos 2025-ci il üçün təklif olunan milli büdcəni təqribən 107,97 milyard dollar həcmində təsdiqləyib ki, bu da 2024-cü il büdcəsindən 10,1 faiz çoxdur.
AZƏRTAC xəbər verir ki, bu barədə Filippinin büdcə və idarəetmə departamentindən bildirilib. Büdcə katibi Amenah Panqandaman ölkənin ümumi daxili məhsulunun 22 faizinə bərabər olan büdcənin 2023-2028-ci illər üzrə İnkişaf planına uyğun olduğunu qeyd edib.
Məlumata görə, dövlət büdcəsindən əsas pay alan qurumlara təhsil, ictimai işlər, səhiyyə, daxili işlər, yerli idarəetmə və müdafiə sahələri daxildir.
Hökumət təklif olunan büdcəni müzakirələr üçün Konqresə təqdim edəcək.
