“Portuqaliya qələbəyə layiq idi”. Bunu Sloveniya millisinin baş məşqçisi Matias Kek Portuqaliyaya qarşı Avro-2024-ün 1/8 final mərhələsinin oyunundan sonra mətbuat konfransında deyib.
Mütəxəssis məğlubiyyətə görə məyus olduqlarını bildirib: “Komanda olaraq çox üzgünük. Futbolçularıma təşəkkür edirəm. Onlar Sloveniya yığmasında oynamağa layiq olduqlarını göstərdilər. Təəssüf ki, bu cür azarkeşlərin qarşısında qalib gələ bilmədik. Bizə gəlincə, turnirdə qalmaq istərdik. Geri qayıtdığımız üçün üzülürəm. Böyük yarışda iştirak etdik və bir qədər də böyüdük”.
Qeyd edək ki, Almaniyada keçirilən Avropa çempionatının 1/8 finalında Portuqaliyaya penaltilər seriyasında məğlub olan Sloveniya turnirlə vidalaşıb.
