Füzuli rayonunun Böyük Bəhmənli kəndində Şəhidlər Abidəsinin yenidən qurulması ilə bağlı işlər davam edir. Bu münasibətlə, deputat Vüqar Bayramov kənd sakinləri ilə görüşüb və işlərin gedişi ilə tanış olub.
QHT.az xəbər verir ki, görüş zamanı deputat Vüqar Bayramov, Rayon İcra Hakimiyyəti ilə birlikdə həyata keçirilən bu təşəbbüsün əhəmiyyətindən danışıb. O, işlərin gedişi ilə bağlı fikir mübadiləsi apararaq, kənd sakinlərinin təklif və narahatlıqlarını dinləyib. O, abidənin yenidən qurulmasına verdiyi dəstəyə görə Azərbaycan Banklar Assosiasiyasına (ABA) təşəkkürünü bildirib. O, ABA-nın bu təşəbbüsə verdiyi dəstəyin çox önəmli olduğunu qeyd edib və bütün şəhidlərimizə Allahdan rəhmət diləyib.
Böyük Bəhmənli kəndi Azərbaycanda ən çox şəhidi olan kəndlərdən biridir. Bu səbəbdən, kənd sakinləri üçün Şəhidlər Abidəsinin yenidən qurulması xüsusi bir əhəmiyyət kəsb edir. "Şəhidlərimizi qürurla anırıq və hər zaman anacağıq," deyən deputat, bu cür layihələrin Şəhidlərimizin xatirəsini yaşatmaq və gələcək nəsillərə onların qəhrəmanlıqlarını çatdırmaq üçün vacib olduğunu vurğulayıb.
Abidənin yenidən qurulması işlərinin tezliklə tamamlanması və gələcək nəsillərə örnək olacaq bir məkana çevrilməsi gözlənilir.
Â
Pərvanə Fərhadqızı
