"Aprelin sonunda Tiflisdə erməni və türk diplomatlarının görüşünün keçirildiyi barədə məlumat var".
"Cebhe.info" xəbər verir ki, bunu "NEWS.am"-ın müxbiri ilə söhbətində rusiyalı politoloq Andrey Areşev deyib.
“Onlar orada nəyi müzakirə edirdilər? Hansı kommunikasiya layihələri? Aydın deyil. Müxtəlif versiyalar irəli sürmək olar, o cümlədən, İlham Əliyevin dediyi kimi, Ermənistan hakimiyyəti Azərbaycanla qaz ticarəti müqabilində Meğridən keçən dəhlizin ekstraterritorial fəaliyyətinə hansısa yolla razılıq verib”, - ekspert vurğulayıb.
O qeyd edib ki, Ermənistan hakimiyyəti Azərbaycanın tələblərinin yerinə yetirilməsinin uzunmüddətli sülh və sabitliyi təmin edəcəyinə inanır.
“Koordinasiyalı fəaliyyət göstərməyən müxalifət Azərbaycanın Tavuşda tələblərinin yerinə yetirilməsinin yeni, daha sərt tələblərlə nəticələnəcəyindən narahatdır. Bununla belə, bu və ya digər şəkildə sərhədlərin demarkasiyası prosesi davam edəcək. Tavuşdan sonra növbə İrəvanı Zəngəzur və İranla birləşdirən Tiqranaşenə çatacaq. Bununla bağlı etirazlar da başlaya bilər, lakin bir-birindən fərqli ictimai qruplar Bakı və İrəvanın razılaşdırılmış, birgə qərarına qarşı çox az şey edə bilər. Belə bir həllin mövcudluğu şübhəsizdir.
Üstəlik, bu qərar beynəlxalq oyunçular, o cümlədən BMT tərəfindən birbaşa dəstəklənir. Rusiya və İran da öz növbəsində bunu nəzərə alıb və bu qərara təsir edə bilmir.
Ermənistan hökumətinin Gürcüstanla və buna görə də Rusiya ilə, eləcə də İranla kommunikasiya əlaqələrinin təmin edilməsi baxımından iki addım irəli baxması vacibdir. Lakin bu məsələnin necə həll olunacağı hələ bəlli deyil”, - deyə politoloq qeyd edib.
Areşev hesab edir ki, İranın reaksiyası diplomatik fəaliyyətə və Bakı ilə mümkün danışıqlara uyğun olacaq:
“Qətiyyətli addımlara gəlincə, İranın bir çox başqa problemləri var. Cənubi Qafqaz regionunda sabitlik Tehran üçün vacibdir”.
Xəzər
"Cebhe.info"
