Ermənistan hökuməti ötən əsrin 90-cı illərinin əvvəlində işğal edilmiş Naxçıvan Muxtar Respublikasının Sədərək rayonunun inzibati ərazisinə aid olan Kərki eksklavını Azərbaycana qaytarmağa hazırlaşır.
Ednews xəbər verir ki, Ermənistan mənbələrinə görə, bu kənd, Qarabağdan miqrasiya edən ermənilərin yerləşdirilməsi planlaşdırılan yaşayış məntəqələrinin siyahısına daxil edilməyib.
Ermənistanın baş nazirinin müavini Tiqran Xaçatryan, Qarabağdan gələn ermənilərin yerləşdirilməsi üçün Azərbaycanla sərhəddə olan kəndlər də daxil olmaqla, 390 yaşayış məntəqəsinin müəyyən edildiyini bildirdi. Orada məskunlaşmaq istəyənlərə hər ailə üzvü üçün 10-12 min dollar məbləğində mənzil sertifikatı təqdim olunacaq. Əmək və Sosial Təminat Nazirliyinin məsləhətçisi Qayane Karagezyan, Kərkinin, ermənilərin "Tiqranashen" adlandırdığı bu kəndin siyahıya daxil edilməməsini şərh edərək, Qarabağ ermənilərinin bu yaşayış məntəqəsinə köçürülməsinin prioritet olmadığını bildirdi.
Kərki kəndi əvvəlcədən təsdiq edilmiş, Qarabağdan gələn ermənilər üçün evlərin tikilməsi planlaşdırılan yaşayış məntəqələrinin siyahısına da daxil edilməyib. Müxalifət deputatı Tiqran Abramyanın sözlərinə görə, bu, hökumətin Kərki də daxil olmaqla dörd eksklav kəndini Azərbaycana qaytarmağa hazırlaşması ilə əlaqədardır.
Hal-hazırda Kərki kəndində 42 ailə yaşayır. Ötən il Qarabağdan bir erməni ailəsi kəndə köçsə də, daha sonra oranı tərk edib.
Kənd strateji əhəmiyyətli, Ermənistanı İranla birləşdirən dövlətlərarası avtomobil yolunun üzərində yerləşir. Kərkinin Azərbaycana qaytarılması ilə bağlı şayiələr əvvəllər də Ermənistanda yayılıb və hökumət bu məlumatı təkzib etməyib. Baş nazir Nikol Paşinyan, çıxışlarından birində, yaşayış məntəqəsi geri qaytarılacağı təqdirdə, Ermənistanı İranla birləşdirən yolun bir hissəsinin başqa əraziyə köçürülməsi ehtimalını istisna etməyib.
Xatırladaq ki, Ermənistan birbaşa danışıqlar nəticəsində eksklav olmayan Qazax rayonunun 4 kəndini Azərbaycana qaytarıb.
Qazax rayonunun Sofulu, Barxudarlı və Yuxarı Əskipara kimi eksklav kəndləri isə hələ də Ermənistanın nəzarəti altındadır. Bu yaşayış məntəqələrinin taleyinin sərhədin delimitasiyası ilə bağlı növbəti danışıqlarda müzakirə olunacağı gözlənilir.
