Bakının Suraxanı rayonunda “26 İyun - Azərbaycan Respublikası Silahlı Qüvvələri Günü” münasibətilə tədbir keçirilib.
“İki sahil” xəbər verir ki, “Suraxanı Oyl S.A.” Əməliyyat Şirkətinin Azərbaycan Respublikasındakı nümayəndəliyinin təşkilatçılığı ilə baş tutan tədbirdə əvvəlcə xalqımızın Ümummilli Lideri Heydər Əliyevin və Azərbaycanın suverenliyi, ərazi bütövlüyü, həmçinin torpaqlarımızın azadlığı uğrunda canından keçmiş Vətən övladlarının xatirəsi bir dəqiqəlik sükutla anılıb.
Daha sonra neft tullantılarından təmizlənmiş ərazidə abadlaşdırma və yaşıllaşdırma işləri görülüb. Mövsümə uyğun ağac və kollar əkilib, Abşeronun sərt iqlim şəraitinə bitkilərin uyğunlaşması üçün damcılı suvarma sisteminin quraşdırılmasına başlanıb.
Tədbirin təntənəli hissəsində çıxış etmiş Əməliyyat Şirkətinin Prezidenti Rövşən Rzayev iştirakçıların diqqətinə çatdırıb ki, məhz Ümummilli Lider Heydər Əliyevin 1998-ci il 22 may tarixli fərmanı ilə 26 iyun Azərbaycan Silahlı Qüvvələri Günü elan edilmişdir. Sonra Müzəffər Ali Baş Komandan İlham Əliyevin rəhbərliyi ilə Azərbaycan Ordusunun Vətən müharibəsində qazandığı şanlı Qələbədən bəhs edilmiş, İkinci Qarabağ müharibəsinin Azərbaycan tarixinə qızıl hərflərlə yazıldığı qeyd edilib.
Suraxanı Rayon İcra Hakimiyyəti başçısı Əziz Əzizov çıxışında qeyd etmişdir ki, müstəqilliyi əbədi, dönməz olan Azərbaycan dövləti regionda davamlı və möhkəm sülhün, sabitliyin bərqərar edilməsində, qorunmasında mühüm rol oynayır. Ümummilli Liderin siyasi kursunu uğurla davam etdirən Prezident, Silahlı Qüvvələrin Müzəffər Ali Baş Komandanı İlham Əliyevin sayəsində bu gün ordumuz dünya orduları ilə müqayisə ediləcək səviyyəyə çatdırılıb.
Tədbirdə çıxış etmiş Yeni Azərbaycan Partiyasının Sabunçu rayon təşkilatının sədri Araz Xudadanov qeyd edib ki, Ümummilli Lider Heydər Əliyevin həyata keçirdiyi uzaqgörən siyasəti uğurla davam etdirən dövlətimizin başçısı İlham Əliyevin atdığı müdrik və qətiyyətli addımlar sayəsində regionda sülh və sabitlik təmin edilib, həm ölkəmiz, həm də region xalqları üçün yeni perspektivlər yaradılıb. Vətənimizin rəşadətli ordusu qəhrəmanlıq və igidlik göstərərək düşmən tapdağında olan ərazilərimizi işğaldan azad etmiş, əsgər və zabitlərimiz adlarını Azərbaycan tarixinə qızıl hərflərlə yazıblar.
Daha sonra çıxış edənlər – Yeni Azərbaycan Partiyasının Suraxanı rayon təşkilatının sədr müavini Salman Əbdülov, ətraf mühitin qorunması üzrə beynəlxalq ekspert Çingiz Məmmədov, qazi, veteran, və şəhidlərin ailə üzvləri, 26 İyun – Silahlı Qüvvələri Gününün əhəmiyyətindən danışıbar. İkinci Qarabağ müharibəsi qəhrəman oğul və qızlarımızın nəyə qadir olduğunu bütün dünyaya nümayiş etdirmişdir.
Sonda, Nümayəndəlik tərəfindən şəhidlərin ailə üzvləri, qazi və veteranlara, ümumilikdə 97 nəfərə, maddi yardım, həmçinin müxtəlif hədiyyələr təqdim olunub.
