Avropa İttifaqının Daimi Nümayəndələr Komitəsi Belarusa qarşı yeni sanksiyalar paketini qəbul edib.
Oxu24.com xəbər verir ki, bu barədə Aİ Şurasına sədrlik edən Belçikanın nümayəndələri məlumat veriblər.
“Bu sanksiyalar paketi Rusiyanın Ukraynaya müdaxiləsinə, o cümlədən sanksiyalardan yayınma ilə mübarizəmizi gücləndirəcək”.
Avropalı diplomatlardan birinin sözlərinə görə, sanksiyalar ikili təyinatlı malları, o cümlədən məişət cihazlarında istifadə edilən çipləri, həmçinin qabaqcıl texnologiyalar və hərbi məhsulları əhatə edir.
Deutsche Welle qeyd edir ki, bu, Belçikanın başçılıq etdiyi daimi nümayəndələrin sonuncu görüşü olduğundan Belarusa qarşı yeni sanksiyalar məsələsi təcili olaraq gündəmə gətirilib.
İyulun 1-dən Avropa İttifaqına Macarıstan rotasiya ilə rəhbərlik edəcək. “Son aylar məlum oldu ki, Rusiyaya qarşı sanksiyaların əsas yayınması Belarus vasitəsilə baş verir.
Biz 14-cü paketlə bağlı danışıqlar apararkən diqqətimizi yalnız Rusiyaya yönəltdik, lakin hələ də bağlanmalı olan boşluq qalır”, - DW-nin Brüsseldəki diplomatik mənbəsi bildirib.
İyunun 24-də Avropa İttifaqı Ukraynadakı müharibə ilə əlaqədar Rusiyaya qarşı yeni, on dördüncü sanksiyalar paketini təsdiqləyib. Sanksiyalar 116 nəfər və şirkətə şamil edilir və həmçinin Rusiyanın mayeləşdirilmiş təbii qazının (LNG) Avropa limanları vasitəsilə tranzitinə də tətbiq edilir. Aİ Rusiyadan LNG almağa davam edəcək, lakin onun təkrar ixracını qadağan edəcək. Aİ Rusiyanın “kölgə” donanmasına da məhdudiyyətlər qoyub və 27 gəmi sanksiyalara məruz qalıb. Onların Avropa limanlarına girişi, Aİ şirkətlərinin isə onlara xidmət göstərməsi qadağan edilib.
Nigar
