Karib dənizinin dərinliklərində uzanan və 300 ildir qazılmağı gözləyən nəhəng bir xəzinə var: “San Jose Galleon” döyüş gəmisi.
İndex.az xəbər verir ki, Kolumbiya hökuməti nəhayət bu xəzinənin üzə çıxarılması üçün kütləvi xilasetmə əməliyyatına başlayıb. Lakin ABŞ, İspaniya, Kolumbiya və hətta Boliviya bu xəzinəyə iddia irəli sürüb.
Qeyd edək ki, “San Jose Galleon” 1698-ci ildə inşa edilmiş və İspaniya armadasına məxsus döyüş gəmisi idi. 64 top, üç dirək və üç göyərtə ilə bu qalyon İspaniya imperiyasının ən qiymətli gəmilərindən biri idi.
O, 1701-ci ildə başlayan İspan Vərəsəlik Müharibəsində fəal rol oynamışdır. Lakin 1708-ci ildə Kolumbiya sularında lövbər saldığı zaman İngiltərə donanmasının hücumuna məruz qaldı və sursat anbarının partlaması nəticəsində batdı. Bu faciəvi hadisədə 600 ekipaj üzvü həyatını itirdi və yalnız 11 nəfər sağ qaldı.
“San Jose Galleon” qəzasında təxminən 18 milyard avro dəyərində olan xəzinə var. Bu xəzinə qızıl və gümüş sikkələr, zümrüdlər, şüşə və farfor kimi qiymətli əşyalardan ibarətdir. Ancaq bu xəzinəyə sahiblik hüququ böyük müzakirə mövzusudur.
Kolumbiya, İspaniya və Amerika xilasetmə şirkəti “Sea Search Armada” (SSA) bu xəzinəyə iddia edir. Bundan əlavə, Boliviyadakı yerli icmalar da bu xəzinənin öz əcdadlarına aid olduğunu iddia edərək ona haqq tələb edirlər.
Kolumbiya hökuməti bu il 4,5 milyon dollar büdcə ilə “San Jose Galleon” üçün xilasetmə əməliyyatına başlayıb. Əməliyyatın birinci mərhələsi olan “xarakteristika” prosesində sualtı robotlar və məsafədən zondlama cihazlarından istifadə edilməklə gəminin qalıqlarının ətraflı xəritəsi yaradılacaq. Bu mərhələ başa çatdıqdan sonra daha əhatəli arxeoloji qazıntılar və elmi tədqiqatların aparılması planlaşdırılır.
Kolumbiyanın mədəniyyət naziri Xuan David Korrea deyib: “Bu mədəni irsi işıq üzünə çıxartmağın etməyin vaxtıdır. Tarix əsl sərvətdir”.
O, bu əməliyyatın əhəmiyyətini vurğulayıb. “San Jose Galleon”un xilasetmə əməliyyatı təkcə maddi xəzinəni deyil, həm də böyük tarixi irsi üzə çıxaracaq.
