Azərbaycan Respublikası Mərkəzi Bankının İdarə Heyətinin faiz dəhlizinin parametrlərinə dair növbəti qərarı barədə press-reliz 21 iyun 2024-cü il tarixində saat 11:00-da yayımlanacaqdır.
Marja.az xəbər verir ki, faktiki və proqnozlaşdırılan inflyasiya hədəflə (4±2%) müqayisədə çox aşağıdır, hətta 2024-cü ilin may ayında istehlak qiymətləri indeksi əvvəlki aya nisbətən düşmüşdür (deflyasiya). Azərbaycan Mərkəzi Bankı faiz aləti ilə qiymətlərin sabitliyinə nail olmuşdur, inflyasiyanın daha da geriləməsi iqtisadi inkişafın sürətinə mənfi təsir edə bilər. Bu səbəbdən Azərbaycan Mərkəzi Bankının faizlərini bir müddət sabit saxlayacağı ehtimalı yüksəkdir. Mərkəzi Bank da inflyasiya amillərinin tarazlıq səviyyəsi, inflyasiyanın cari dinamikası və pul siyasətindən kənar amillərin monetar şəraitə və məcmu tələbə təsirilə əlaqədar olaraq faiz dəhlizi parametrlərinin yaxın perspektivdə dəyişməz saxlanılması ehtimalını yüksək olduğunu bildirmişdi.
Ötən iclasdan bəri (01 May 2024-dən bu yana) illik inflyasiya tempi azalmaqda davam etmişdir. 2024-cü ilin mayında 12 aylıq inflyasiya 0.3%, yanvar-may ayları üzrə inflyasiya isə (2023-cü ilin yanvar-may aylarına nisbətən) illik 0,6% təşkil etmişdir.
Xatırladaq ki, 01 May 2024-cü il tarixində Azərbaycan Respublikası Mərkəzi Bankının İdarə Heyəti uçot dərəcəsinin 7.5%-dən 7.25%-ə, faiz dəhlizinin yuxarı həddinin 8.5%-dən 8.25%-ə endirilməsi, faiz dəhlizinin aşağı həddinin isə 6.25% səviyyəsində dəyişməz saxlanılması haqqında qərar qəbul etmişdir.
28 Mart 2024-cü il tarixində Azərbaycan Respublikası Mərkəzi Bankının İdarə Heyəti uçot dərəcəsinin 7.75%-dən 7.5%-ə, faiz dəhlizinin yuxarı həddinin 8.75%-dən 8.5%-ə endirilməsi, faiz dəhlizinin aşağı həddinin isə 6.25% səviyyəsində dəyişməz saxlanılması haqqında qərar qəbul etmişdir.
31 yanvar 2024-cü il tarixində isə, Azərbaycan Respublikası Mərkəzi Bankının İdarə Heyətinin qərarı ilə uçot dərəcəsi 8%-dən 7.75%-ə, faiz dəhlizinin aşağı həddi 6.5%-dən 6.25%-ə, faiz dəhlizinin yuxarı həddi isə 9%-dən 8.75%-ə endirilmişdir.
Bu qərarlar faktiki və proqnozlaşdırılan inflyasiyanın hədəflə (4±2%) müqayisəsi, inflyasiya gözləntilərinin stabilləşməsi, risk balansında baş verən dəyişikliklər nəzərə alınmaqla verilmişdir. Proqnozlaşdırılan inflyasiyanın aşağıya doğru dəyişdiyini nəzərə almaqla faiz dəhlizinin yuxarı həddinin və uçot dərəcəsinin azaldılması monetar şəraitin yumşalmasına yönəldilmişdir. Aşağı həddin dəyişməz saxlanılması isə banklararası faizlərin dəyişkənliyinin azaldılmasına xidmət edir. Faiz dəhlizinin bu parametrləri müəyyənləşdirilərkən onların banklararası pul bazarındakı faizlərə təsir potensialı da nəzərə alınmışdır.
"Pul siyasəti ilə bağlı növbəti qərarlar faktiki inflyasiyanın proqnozla müqayisəsindən, xarici və daxili mənşəli risk amillərinin dinamikasından asılı olacaqdır. İnflyasiya amillərinin tarazlıq səviyyəsi, inflyasiyanın cari dinamikası və pul siyasətindən kənar amillərin monetar şəraitə və məcmu tələbə təsiri faiz dəhlizi parametrlərinin yaxın perspektivdə dəyişməz saxlanılması ehtimalını yüksəldir. Qarşıdakı dövrdə də makroiqtisadi göstəricilərin hərtərəfli təhlili davam etdiriləcək, ölkədə qiymət sabitliyini təmin etmək üçün bütün mövcud vasitələrdən istifadə ediləcəkdir",- Mərkəzi Bank bəyat etmişdi.
Uçot dərəcəsi:
02.05.2024 7.25%
29.03.2024 7.50%
01.02.2024 7.75%
21.12.2023 8.00%
02.11.2023 8.50%
04.05.2023 9.00%
30.03.2023 8.75%
02.02.2023 8.50%
Yuxarı həddi
02.05.2024 8.25%
29.03.2024 8.5%
01.02.2024 8.75%
21.12.2023 9.0%
02.11.2023 9.5%
04.05.2023 10.0%
30.03.2023 9.75%
02.02.2023 9.5%
Aşağı həddi
01.02.2024 6.25%
21.12.2023 6.5%
02.11.2023 7.0%
04.05.2023 7.5%
30.03.2023 7.0%
02.02.2023 6.75%
