"Aqrar Sığorta Müştərək Sığorta Şirkəti" ASC 2023-cü ili 57 min 194 manat xalis mənfəət ilə başa vurub. Şirkət 2022-ci ili 170 min 150 manat xalis mənfəət ilə bağlamışdı. Beləliklə, ötən il "Aqrar Sığorta Müştərək Sığorta Şirkəti"nin xalis mənfəəti 3 dəfəyə yaxın azalıb.
Marja.az xəbər verir ki, "Aqrar Sığorta Müştərək Sığorta Şirkəti"nin cəmi gəlirləri 2022-ci ildə 17 milyon 504 min manat ikən, 2023-cü ildə 11 milyon 381 min manata düşüb. Yığılan sığorta haqları isə 13 milyon 773 min manatdan 16 milyon 873 min manata yüksəlib. Cəmi gəlirlərdə azalma ehtiyata 8 milyon 304 min manat ayırma ilə əlaqədar olub.
2023-cü ildə "Aqrar Sığorta Müştərək Sığorta Şirkəti"nin sığorta ödənişləri 1,8 dəfə artaraq 4 milyon 406 min manat təşkil edib. 2022-ci ildə şirkətin sığorta ödənişləri 2 milyon 396 min manat olmuşdu.
"Aqrar Sığorta Müştərək Sığorta Şirkəti" Aqrar Sığorta Fondunu idarə edir. Aqrar Sığorta Fondu dövlət tərəfindən təsis olunan və riskləri daşıyaraq sığorta ödənişini həyata keçirən qeyri-kommersiya hüquqi şəxsdir. İdarəedici Şirkət isə qeyri-həyat lisenziyasına malik olan sığorta şirkətləri tərəfindən təsis olunan və sığorta müqavilələrinin bağlanmasını təşkil edən müştərək sığortaçıdır.
"Aqrar Sığorta Müştərək Sığorta Şirkəti" ASC 31 avqust 2020-ci il tarixində Azərbaycanda fəaliyyət göstərən 7 sığorta şirkəti (“Azərbaycan Sənaye Sığorta” ASC, “AzSığorta” ASC, “Bakı Sığorta” ASC, “Xalq Sığorta” ASC, “Qala Sığorta” ASC, “Meqa Sığorta” ASC, “PAŞA Sığorta” ASC) tərəfindən bərabər paylarla təsis edilib.
