Bakı, 8 iyun, AZƏRTAC
Azərbaycanın veteran cüdoçuları Bosniya və Herseqovinanın paytaxtı Sarayevo şəhərində keçirilən Avropa çempionatının ikinci günündə 2 qızıl və 3 bürünc medal qazanıblar.
Azərbaycan Cüdo Federasiyasından AZƏRTAC-a verilən məlumata görə, M3 yaş kateqoriyası üzrə 66 kiloqramda mübarizə aparan Vüqar Babayev fəxri kürsünün ən yüksək pilləsinə qalxıb.
60 kiloqramda Mənsur Abbasov, 81 kiloqramda Azər Fətullayev və 100 kiloqramda Nizami Məmmədov bürünc mükafata yiyələniblər. 100 kiloqramda çıxış edən Valeri Fomin 5-ci, Ramil Muradov isə 7-ci pillədə qərarlaşıblar.
M4 yaş kateqoriyası üzrə 100 kiloqramda Emil Hüseynov birinci yeri tutub. 73 kiloqramda Əli Əlibəyli isə üçüncü sırada yer alıb. 60 kiloqramda Babək Hacıyev, 66 kiloqramda Rəfael Mehdiyev, 81 kiloqramda Rauf Fərzəliyev və 90 kiloqramda Mahir Ağamirzəyev 5-ci olublar.
Qeyd edək ki, yarışın ilk günündə Azərbaycanın veteran cüdoçuları 3 medal qazanıblar. İyunun 9-na kimi davam edəcək qitə birinciliyində 35 ölkədən 800 cüdoçu mübarizə aparır.
