Premyer Liqanın 36-cı tur “Kristal Pelas”la oyunu “Mançester Yunayted”in braziliyalı dayaq yarımmüdafiəçisi Kazemiro üçün xoşagəlməz olub.
Arena.az məlumat verir ki, “qartallar”ın “qırmızı şeytanlar”ı 4:0 hesabı ilə didişdirdiyi bu oyunda “Kristal Pelas” futbolçuları Kazemironu 8 dəfə dolayıb girinc ediblər ki, bu da cari mövsümdə İngiltərə Premyer Liqasının antirekordudur.
Kazemiro “Mançester Yunayted”ə 2022-ci ilin avqustunda 70,65 milyon avro müqabilində “Real”dan keçib. Braziliyalı “dayaqçı”nın “qırmızı şeytanlar”la müqaviləsi 2026-cı ilin iyun ayının sonuna qədər qüvvədədir.
Cari mövsümdə Kazemiro “Mançester Yunayted”in heyətində bütün yarışlarda 29 oyuna çıxıb, 5 qol vurub, 3 məhsuldar ötürmə verib.
Vurğulayaq ki, “qırmızı şeytanlar”ın azarkeşləri braziliyalı futbolçunun çıxışından elə də məmnun deyillər və zaman-zaman onun ünvanına tənqidi fikirlər səsləndirirlər.
Kazemironun “Mançester Yunayted” karyerası ümumilikdə 80 oyun, 12 qol və 9 məhsuldar ötürmədən ibarətdir. Braziliyalı futbolçu “qırmızı şeytanlar”la ötən mövsüm İngiltərə Liqa Kubokunun qalibi olub.
Kazemiro 2011-ci ilin sentyabr ayında debüt etdiyi Braziliya yığmasının heyətində 75 oyuna çıxıb, 7 qol vurub və 3 məhsuldar ötürmə verib.
“Transfermarkt” internet-portalı 32 yaşlı braziliyalı dayaq yarımmüdafiəçisinin transfer dəyərini 30 milyon avro məbləğində qiymətləndirir.