Keçən ayın 28-i keçirilən magistr imtahanına düşmüş suallar istər tələbələr, istərsə də bu sahədə tələbə hazırlaşdıran kurslar tərəfində ciddi tənqid olunub. Belə ki, adıçəkilən şəxslər builki imtahanın digər illərə nisbətən daha çətin olduğunu, DİM bazasında olmayan sualların imtahana düşdüyü vurğulanır. Həmçinin fevral və aprel aylarında keçirilən imtahanların çətinlik səviyyəsinin də bir-birindən fərqləndiyi bildirilir. Sorğumuzu cavablandıran şəxlər onu da bildirdi ki, fevral ayında keçirilən imtahanda informatika və ingilis dili nisbətən çətin idisə, aprel ayında keçirilmiş imtahanda isə məntiq digər fənnlərdən daha çətin olub.
Bu ilin sualları digər illərə nisbətən niyə daha çətin olub, ümumiyyətcə sualların çətinlik səviyyəsi necə hesablanır? Keçən illərdə keçirilən imtahanlardan əlavə bu il fevral və aprel aylarında keçirilən imtahanlarda da çətinlik dərəcəsi fərqlənirdi, beləki fevral ayında informatika və ingilis dili daha çətin olduğu düşünülürdüsə indi isə, aprel ayında keçirilən imtahanda isə məntiq fənnindən daha çətin suallar salındığı vurğulanır. DİM bu sualları hansı meyyara görə yığır və ümumi şöbə varmı bu sualları tənzimləyən?
Mövzu ilə bağlı DİM-nin ictimaiyyətlə əlaqələr şöbəsinin rəhbəri Xanlar Xanlarzadə ilə əlaqə saxladıq və o, bu haqda suallarımızı cavablandırdı:
"Magistraturaya qəbul imtahanı seçmə və yerləşdirmə məqsədi ilə keçirilir. Bu prosesdə müxtəlif hazırlıq səviyyəsinə malik minlərlə bakalavr iştirak edir. Məhz bu fərqlilikləri ortaya çıxarmaq və bakalavrlar arasında seçim edə bilmək üçün imtahanda mürəkkəblik dərəcəsi asan, orta və çətin tipli test tapşırıqlarından istifadə edilir. Çünki imtahanda yalnız zəif və orta hazırlıqlı bakalavrlar deyil, yaxşı hazırlıqlı bakalavrları da bir-birindən fərqləndirmək tələb olunur. Hazırda yekun imtahan nəticələri elan olunmayıb. Ona görə də heç kəs konkret fikir söyləyə bilməz. İmtahanın mürəkkəblik dərəcəsi sosial şəbəkələrdə yazılanlara əsasən müəyyən edilmir. Nəticələr elan olunduqdan sonra lazımi göstəricilər ictimaiyyətə təqdim olunacaq.
Ancaq ənənəvi təhlillər göstərir ki, test tapşırıqlarının çətin olması ilə bağlı bəzi iştirakçılar tərəfindən səsləndirilən mülahizələr həqiqətə uyğun olmur. Müxtəlif vaxtlarda keçirilən imtahanlarda imtahan iştirakçılarının orta balı statistik xəta çərçivəsindən kənara çıxmır və bir-birinə yaxın olur".
