Bakıda ƏMƏLİYYAT: mağazalarda bıçaq satanlar tutuldu - VİDEO

Məişət təyinatı olmayan soyuq silahlar insan həyatı və sağlamlığı üçün potensial təhlükə mənbəyidir. Müxtəlif təyinatlı kəsici-deşici alətlərin satışı və gəzdirilməsinin ictimai təhlükəsizliyə aşkar təhdid yaratması nəzərə alınaraq, onların satışının qarşısının alınması istiqamətində polis əməkdaşları tərəfindən silsilə tədbirlər görülür.

Daxili İşlər Nazirliyindən Lent.az-a verilən xəbərə görə, belə tədbirlər zamanı kəsici-deşici alətlərin sosial şəbəkələrdə və paytaxt ərazisində müxtəlif ticarət mərkəzlərində yerləşən mağazalarda satışını təşkil edən 25 yaşlı Hüseynov Nurəddin, 38 yaşlı Səfərov Elşən, 34 yaşlı Əliyev Nihat, 39 yaşlı Hacıyev Ariz, 44 yaşlı Rəhimov Vahid və əvvəllər xuliqanlıq əməlinə görə məhkum olunmuş 37 yaşlı Hüseynov Anar müəyyən olunaraq saxlanılıblar. 

Onlardan xəsarət yetirmək təyinatına malik, satışı nəzərdə tutulan 400 ədədə yaxın kəsici-deşici alət aşkar olunaraq götürülüb, təbliğatını apardıqları sosial şəbəkə hesablarının fəaliyyəti məhdudlaşdırılıb.

Maddi sübut kimi götürülən həmin silahlarla bağlı müvafiq ekspertiza təyin olunub, saxlanılan şəxslər barəsində araşdırma aparılır. Araşdırmanın nəticəsindən asılı olaraq onların əməlinə hüquqi qiymət veriləcək. 

Daxili İşlər Nazirliyi məişət təyinatı olmayan soyuq silahların satışının məsuliyyət yaratdığını diqqətə çatdıraraq bunu təşkil edən şəxsləri  əməllərindən çəkinməyə çağırır.