Oktyabrın 22-də CCAAIBWS-in sədri, Avropa Azərbaycan Məktəbinin direktoru Françesko Bankini Bakı Dövlət Universitetində “Gənclərin Liderlik Bacarıqlarının Gücləndirilməsi” mövzusunda interaktiv seminar keçirib.
Avropa Azərbaycan Məktəbindən APA-ya verilən xəbərə görə, Tələbə Gənclər Təşkilatı, “BDU könüllüləri” və Tələbə Həmkarlar İttifaqı Komitəsinin birgə təşkilatçılığı keçirilən seminarda BDU-nun tələbə və magistrantları iştirak ediblər.
Seminardan əvvəl BDU rektoru Elçin Babayev ilə Françesko Bankini arasında təkbətək görüş keçirilib. E. Babayev bu təlimin gənclər üçün nə qədər əhəmiyyətli olduğunu vurğulayaraq Françesko Bankiniyə minnətdarlığını bildirib. O, universitetin belə təşəbbüsləri yüksək qiymətləndirdiyini və bu cür təlimlərin tələbələrə liderlik bacarıqlarını inkişaf etdirmək üçün böyük töhfə verdiyini bildirib.
Seminar tələbələrə liderlik qabiliyyətlərinin inkişafına dair vacib anlayışlar təqdim etməklə yanaşı, konvergent və divergent düşüncə, yaradıcı problemlərin həlli və çətinliklərə açıq fikirli yanaşmanın əhəmiyyəti kimi əsas mövzuları əhatə edib.
Cənab Bankini şəxsi təcrübələrini bölüşərək, tələbələrə kritik və yaradıcı düşüncə ilə yanaşı, şəxsi və peşəkar həyatlarında rast gəlinən çətinlikləri aşmaq üçün praktik strategiyalar təqdim edib. O, tələbələrə yaradıcı həll yollarının karyera və liderlik rollarına necə təsir edə biləcəyini anlamaqda yardımçı olub.
Seminar zamanı tələbələrə liderlik mövzusunda suallarını birbaşa cənab Bankiniyə ünvanlamaq imkanı yaradan sual-cavab sessiyası keçirilib. Eyni zamanda, seminarın sonunda tələbələri kreativ düşüncəyə ilhamlandırmaq məqsədilə xüsusi musiqili fəaliyyət təşkil olunub. Bu interaktiv anlar tələbələrin seminar mövzularına daha dərin inteqrasiya olunmasına və gələcək liderlik rollarına hazırlaşmasına yardım edib.
Seminarda iştirak edən tələbələr bu dəyərli sessiyadan olduqca məmnun qaldıqlarını qeyd ediblər.
