Futbol üzrə İngiltərə yığmasının və “Nyukasl”ın hücumçusu Entoni Qordon Premyer Liqa təmsilçisi ilə yeni müqaviləyə imza atıb.
Arena.az bu barədə klubun mətbuat xidmətinə istinadən xəbər verir.
“Nyukasl” futbolçusu ilə uzunmüddətli müqavilə imzalandığını bəyan edib. Amma 23 yaşlı hücumçunun sözləşməsinin neçənci ilə qədər uzadıldığı açıqlanmayıb.
Xatırladaq ki, Qordon 2023-cü ilin yanvar ayında 45,6 milyon avro qarşılığında “Everton”dan “Nyukasl”a keçib. O, bu mövsüm 10 oyuna çıxıb, 2 qola imza atıb. Qordonun “Nyukasl”ın heyətində statistikası belədir – 74 oyun, 15 qol və 11 məhsuldar ötürmə.
“Liverpul”un yetirməsi olan Entoni Qordon “Everton” və “Preston” klublarının da şərəfini qoruyub.
Qordon İngiltərənin U-18, U-19, U-20 yığmalarında, gənclərdən ibarət millidə forma geyinir. Bu ilin mart ayında isə o, əsas millidə debüt edib. Qordon İngiltərə yığmasının heyətində 6 oyuan çıxsa da, məhsuldar fəaliyyəti ilə diqqət çəkməyib.
“Transfermarkt” internet-portalı 23 yaşlı futbolçunun transfer dəyərini 60 milyon avro məbləğində qiymətləndirir.
