“ Təəssüf ki, uduzduq. İstəməzdik ki, öz meydançamızda belə məğlub olaq. Düşünəcək, deyəcək söz yoxdu. Rəqibi təbrik etməliyik. Bəlkə də layiqli qələbə qazandılar. Epizodlarımız oldu. "Malmö"nün fərqli oyun tərzinə malik olduğunu demişdim. İkinci hissədə erkən qol buraxdıq. Əksinə, ikinci hissəyə aqressiv başlamalıydıq. İlk dəqiələrdə belə qol buraxmaq futbolçulara təsir etdi. Yaxşı komandayıq, daha yaxşı oynaya, daha yaxşı nəticə əldə edə bilərik. Ola bilər ki, komanda bu aralar öz oyun ritmindən uzaqlaşıb. Ümid edirəm ki, qarşıdakı vaxtlarda daha yaxşı olacağıq”.
- Çempionatdakı rəqabətsizliyə görə avrokuboklarda uduzursuz?
- Xeyr. İndi elə perioddayıq ki, bu haqda düşünmək olmaz. Xeyli sayda avrokubok oyunları keçirmişik. İnanmıram ki, hazırkı durum nəticəmizə təsir edir. Sadəcə, ola bilər ki, bir neçə futbolçumuzun zədəli olması oyun planında geriləməyə səbəb olub.
- Üç əvəzetmə etdiz, amma Yankoviçlə bağlı pauza verdiz. Bunun səbəbi nədi?
- Romao bir az özünü yaxşı hiss etmirdi. Ona görə pauza etdim. Sonda da məncə, düzgün addım atdıq. Özünü pis hiss edirdi.
- Bəs Bəhlul?
- İlk hissədən sonra ağrısı var idi. İkinci hissədə hiss etdim ki, öz gücü ilə oynaya bilmir. İynə vurub çıxmışdı meydana.
- Sanki "Qarabağ" əvvəlki həvəsdə deyil, komandada nəsə baş verir, əvvəlki kimi oynaya bilmir. Futbolçular həvəsdən düşüb, yoxsa yorğunluq var?
- Həvəsdən düşdüklərini deməzdim. Ola bilər indi elə vaxtdı ki, öz oyun ritmlərindən uzaqlaşıblar. Bəlkə də psixoloji yorğunluq var. Bu komandada həvəssizlik heç vaxt düşünülməyib. Sadəcə, məğlub oluruqsa, düşünməliyik ki, əvvəl bəlkə də daha istəkliydik. Bunu qəbul etməliyik. Bir az bəzi oyunçularda... Mən görürəm, bilirəm. Bəzi futbolçular öz idman formasından uzaqdı. Ölkə çempionatında görünməyə bilər. Amma avrokubok oyunlarında hiss olunur. Biz daha yaxşı oynaya bilərik. Bəzi düşündüyüm xırda elementlər aradan qalxdıqda belə olacaq. Bu oyun bir daha göstərdi ki, belə matçlarda daha çox motivasiya, dinamika olmalıdı, güc sərf etməliyik. Bu gün uduzsaq da, faydası olacaq.
- "Malmö" rəqiblər arasında zəiflərdən hesab olunurdu. Digər rəqiblərimiz daha güclüdü. Onlarla oyunda nə edəcəksiz?
- Heç kimə zəif gözü ilə baxmırıq. Hər biri Avropa komandasıdı.Özümüzü də çox zəif saymırıq. Qarşıda dəyişik nəticələr çox olacaq.
- "Qarabağ" kifayət qədər çox epizodları yaradır. Ən çox nəyin üstündə işləmək lazımdı ki, məntiqi sonluq vaxtında gəlsin?
- Fərdi yöndə. Yaxşılaşdıra bilərik. Belə oyunlarda həyəcan olmasın. Həyəcana görə epizod vurulmasa, problem ola bilər. Amma texniki səhvdisə, yaxın zamanda yaxşılaşdırmaq olar.
- Buntiç və Koxalski etibarlı qapıçılar sayıla bilməz. Şahruddin yenə əsas qapıçı kimi görünür. Qapıçılarla bağlı düşüncəniz necədi?
- Hər ikisinin yetərincə bacarığı, keyfiyyəti var. Ola bilər ki, hələ tam uyğunlaşa bilməyiblər. Hər ikisinə inanıram, güvənirəm, böyük potensialları var. Şahruddinin yaxın zamanlarda meydana dönməsi görünmür. Fərdi məşqlərə başlayıb. Kollektivlə başlamasına xeyli vaxt lazım olacaq. Məncə, hər ikisi güvəniləsi qapıçıdı. Çempionata tam uyğunlaşandan sonra onlardan çox faydalanacağıq. Bu gün atacaq addımımız yoxdu.
- Qorxmursuz ki, psixoloji amil sonrakı matçlarınıza da təsir edə bilər?
- Qorxacaq, çəkinəcək bir şey yoxdu. Neçə illərdi bu işin içindəyik. Bir insan ilboyu sağlam ola bilməz. Komandalar da hansısa müddət öz formasından uzaqlaşır. Belə hallara çox soyuqqanlı yanaşmalıyıq.
- "Dinamo" səddini keçə bilməmək komandaya psixoloji cəhətdən təsir etdi? Sanki komanda o oyunda qalıb...
- Təsir etdi. Amma bu günə kimi qaldığını düşünmürəm. Xeyli müddət nəinki öz aramızda, azarkeşlər arasında, mediada belə fikirlər formalaşıb. Hamının gözü Çempionlar Liqasının Liqa mərhələsində idi. Bu, normal haldı. Hamınız bunu daim istəməlisiz. Biz isə belə hallarda daha da soyuqqanlı, daha da möhkəm olmalıyıq və komandanın problemi varsa, onu yoluna qoymalıyıq.
ƏSƏD SEYİDOV
