Yaponiyanın Miyazaki hava limanında İkinci Dünya Müharibəsindən qalma Amerika bombasının taksi yolunda partlaması səbəbindən 80-dən çox reys təxirə salınıb.
Musavat.com “The Washington Times” qəzetinə istinadən xəbər verir ki, o vaxt partlamayaraq Yaponiya hava limanında torpağın altında qalan bomba oktyabrın 2-də partlayıb.
Qeyd olunur ki, Yaponiyanın cənub-qərbindəki Miyazaki hava limanında baş verən partlayış nəticəsində taksi yolunda böyük krater yaranıb və bu, uçuşların təxirə salınmasına səbəb olub.
Yaponiyanın Torpaq və Nəqliyyat Nazirliyinin rəsmiləri partlayış zamanı yaxınlıqda heç bir təyyarənin olmadığını və tələfatın qeydə alınmadığını açıqlayıb.
Araşdırmalar göstərib ki, partlayan 500 kiloluq Amerika bombasıdır. İndi ekspertlər qəfil partlayışa nəyin səbəb olduğunu müəyyənləşdirirlər.
Yaxınlıqdakı aviasiya məktəbi tərəfindən qeydə alınan videoda partlayışın asfalt parçalarını fəvvarə kimi havaya qaldırdığı görünür. Nazirlər Kabinetinin Baş Katibi Yoşimasa Hayaşi uçuşların sabah bərpa edilməsinin planlaşdırıldığını deyib.
Miyazaki Hava Limanı 1943-cü ildə Yaponiya İmperator Donanması üçün keçmiş təlim aerodromu kimi tikilib və buradan bəzi kamikadze pilotlar intiharla nəticələnən hücumlar həyata keçirmək üçün uçuşlar ediblər.
Ərazidə İkinci Dünya Müharibəsi zamanı ABŞ hərbçiləri tərəfindən atılan bir neçə partlamamış bomba aşkar edilib. O dövrə aid yüzlərlə ton mərmi Yaponiyanın hər yerində basdırılmış vəziyyətdə qalır, bəzən tikinti işləri zamanı aşkar edilir.
Musavat.com
