Xaçmaz rayonunda 1981-ci il təvəllüdlü Daşqın qısqanclıq zəminində mübahisə zamanı həyat yoldaşı Könülü (adlar şərti verilib – red.) qətlə yetirib.
Publika.az Teleqraf.com-a istinadla xəbər verir ki, Daşqın arvadı Könülün dəfələrlə açıq-aşkar başqa kişilərlə yaxın münasibətdə olaraq xəyanət etməsi səbəbindən onu öldürmək qərarına gəlib.
O, yaşadığı evdə arvadını azyaşlı övladlarının gözləri qarşısında döyərək yerə yıxıb. Daha sonra ardıcıl şəkildə Könülün başını beton döşəməyə vurduqdan sonra mətbəxdə olan taxta masanı onun üzərinə atıb. Hadisə yerinə gəlmiş qayınanasının gözləri qarşısında Könülə daha bir neçə təpiklə zərbələr vurub.
Qadın xəstəxanaya yerləşidirilib. Ona tibbi yardım göstərilməsinə baxmayaraq, həyatını xilas etmək mümkün olmayıb.
İstintaq orqanı tərəfindən Daşqının barəsində Cinayət Məcəlləsinin 120.2.4-cü (xüsusi amansızlıqla və ya təhlükəli üsualla adam öldürmə) maddəsi ilə ittiham elan edilib.
“Arvadımı güdməyə başladım”
Cinayət işi üzrə təqsirləndirilən şəxs qismində ifadə verən Daşqın ona elan olunmuş ittiham üzrə təqsirli bilib. Bildirib ki, sinif yoldaşı və həmkəndlisi Ramal ona yaxınlaşaraq arvadı Könülün özünü kənddə şübhəli apardığını, başqa kişilərlə münasibət saxladığını deyib: “Dostum mənə ayıq olmağı məsləhət gördü. Bundan sonra arvadımı güdməyə başladım. Həmin vaxt arvadım kənddə bağda fərdi meyvə yığımı ilə məşğul olurdu. Səhər işə gedib, axşam evə qayıdıb.
Bir neçə gün sonra evdə olan zaman Könülün bir kişi ilə telefonda danışdığını tutdum. Ondan kiminlə danışdığını soruşdum. Açıq şəkildə kişi ilə danışdığını bildirdi və “ya ikiniz, ya da heç biriniz” deyərək onun başqaları ilə münasibət saxlamağıma göz yummağımı istədi. Bu hərəkətlərindən qəzəblənərək evdə onu döydüm”.
“Düz yola qayıdacağını fikirləşdim”
Təqsirləndirilən şəxs qeyd edib ki, Könül ondan polisə şikayət edib, Xaçmaz Rayon Məhkəməsi tərəfindən 20 gün inzibati qaydada həbs edilib: “Həbsdən çıxıb evə qayıtdım. Könül yenidən öz çirkin əməllərindən əl çəkmədi. Hətta bir gün gecə yuxudan oyandıqda onun evdə olmadığını gördüm. Səhərə kimi gözlədim.
Səhər saat 6-da arvadım evə gələndə harada olduğunu soruşdum, əcəb elədiyini dedi. Uşaqlarımı düşündüyüm üçün Könüldən boşanmadım. Nə vaxtsa peşman olaraq düz yola qayıdacağını fikirləşdim. Bu barədə dəfələrlə Könülün atası Səmədə dedim. Lakin heç bir nəticəsi olmadı. Çünki qaynatam və qayınlarım Könülün tərəfini saxlayaraq ona heç bir söz demədilər”.
“İntim münasibətdə olduğunu dedi”
Daşqının sözlərinə görə, arvadı Könülün gecələr evdən getməsi adət halını alıb, artıq nə edəcəyini bilməyib: “Kənd camaatından xəbər aldım ki, arvadım Xudat şəhərində “qaraçılar məhləsi” deyilən yerdə yaşayan Adil adlı bir kişi ilə görüşür. Mən Adili taparaq onunla Könülün ilə aralarında olan münasibət barədə soruşdum.
Adil mənə açıq-aydın Könüllə intim münasibətdə olduğunu dedi. Barəsində polisə şikayət etdikdən sonra daha Könüllə görüşmədi. Bir müddət arvadım özünü normal apardı, onu kiminləsə danışan görmədim. Daha düz yola qayıtdığını düşündüm”.
“Məni lağa qoyurdular”
Daşqın qeyd edib ki, növbətu günlərdə yaşadığı evin qarşısında olan zaman boz rəngli “Mercedes” markalı nömrəsini xatırlamadığı avtomobilin evinin qarşısında saxladığını görüb:
“Arxa qapıdan Könül düşüb evə girdi. Küsülü olduğumuz üçün ona bir söz demədim. Könül demək olar ki, hər axşam həmin avtomobillə evə gəlirdi. Artıq qonşular arasında biabır olmuşdum, kənddə məni lağa qoyurdular. Küçədə arxadan mənə söz atırdılar. Artıq nə edəcəyimi bilmirdim.
Bütün bunlardan bezərək Könülü öldürmək qərarına gəldim. Buna görə də evdə onun işdən gəlməsini gözlədim. Söz-söhbətə bir dəfəlik son qoymağı qərara aldım”.
“Arvadımın öldüyünü bildirdilər”
Təqsirləndirilən şəxsin ifadəsinə görə, evdə tək 250 qram araq içib: “Axşam Könül işdən evə gəldi. Həmin vaxt iş yerində işçilərə ayrılmış “Qazel” markalı avtomobillə gəlmişdi. O, evə daxil olduqdan sonra mətbəxdə onun sifət nahiyəsinə şillə ilə vuraraq yerə yıxdım. Sonra sağ ayağımla təpikləməyə başladım. Sağ ayağımın altı ilə yuxarıdan-aşağı istiqamətdə onun baş və qarın nahilərinə təxminən 7-8 güclü zərbələr vurdum.
Səs-küyə evdə olan uşaqlarım Elçin və Günay gəldi. Oğlum məni tutaraq anasını qorumağa çalışdı. Mən isə sağ əlimlə Elçinin boğaz nahiyəsindən tutaraq kənara itələdim. Bundan sonra uşaqlar qorxaraq çölə çıxdılar. Hirsim soyumadığı üçün mətbəxdə olan masanı çevirərək birdəfəlik ölməsi üçün Könülün üstünə atdım. Arvadımın hərəkətsiz qalaraq tərpənmədiyini gördükdə öldüyünü düşündüm və daha onu vurmadım.
