Yaponiyanın Çinə mesaj vermək üçün tarixində ilk dəfə olaraq Tayvan boğazına döyüş gəmisi göndərməsi barədə xəbərlər mətbuatın gündəmini zəbt edib.
Bir sıra hökumət mənbələrinə istinadən “Yomiuri” qəzeti Yaponiyanın Dəniz Özünümüdafiə Qüvvələrinə məxsus döyüş gəmisinin çərşənbə günü (sentyabrın 25-də) səhər saatlarında Tokionun Pekinin regiona iddialarına qarşı çəkindirici tədbirləri gücləndirməyə qərar verdiyi bir vaxtda Şərqi Çin dənizindən boğaza doğru hərəkət etdiyini bildirib.
Dəniz Özünümüdafiə Qüvvələrinin esminesi boğazı keçmək üçün Avstraliya və Yeni Zelandiyadan gələn hərbi gəmilərlə birlikdə 10 saatdan çox cənuba doğru hərəkət edib. Üç ölkənin donanması suverenlik mübahisələrinin yaşandığı Cənubi Çin dənizində cümə axşamı günü keçirilməsi planlaşdırılan çoxtərəfli təlimdə iştirak etmək üçün yola düşüb.
Yaponiya Nazirlər Kabinetinin Baş Katibi Yoşimasa Hayaşi keçidlə bağlı şərh verməkdən imtina edib, lakin Çinin bölgədə artan hərbi fəaliyyətindən narahatlığını bildirib. “Qısa müddət ərzində bir-birinin ardınca hava məkanının pozulması ilə bağlı güclü böhran hiss edirik”, – Hayaşi mətbuat konfransında deyib.
Çinin cümə axşamı keçiriləcək müntəzəm mətbuat konfransında cavab verəcəyi gözlənilir.
Çinin dövlət media qurumlarından biri olan Global Times xəbər verib: “Çin Xalq Azadlıq Ordusu onları izləyib və bütün proses boyu nəzarətdə saxlayırıq”.
Demokratik şəkildə idarə olunan Tayvanın öz ərazisi olduğunu iddia edən Çin, keçmişdə bu sulardan keçən oxşar keçidlərə sərt reaksiya vermiş, onları suverenliyinə təhdid kimi qiymətləndirmişdi.
Bu son keçidin, Çin və Tokio arasındakı son ərazi mübahisələri ilə yanaşı, Pekinlə gərginliyi daha da artıracağı gözlənilir.
Keçən həftə Yaponiya Çin Xalq Azadlıq Ordusu Hərbi Dəniz Qüvvələrinin təyyarədaşıyan Liaoning və iki esminesinin Sakit Okeana yeni marşrutla getməsinə etiraz etmişdi. Yaponiya Çin təyyarədaşıyan gəmisinin ilk dəfə olaraq onun ərazi sularına daxil olduğunu və ölkənin ən qərbindəki Yonaquni adası ilə yaxınlıqdakı İriomote adası arasından keçdiyini bildirib.
Yaponiya Müdafiə Nazirliyi ötən ay Çin hərbi təyyarələrinin ilk dəfə ölkənin hava məkanına daxil olması ilə gərginliyin artdığını bildirib.
Bu yaxınlarda Almaniya 22 ildən sonra Tayvan boğazını keçən ölkələrdən biri oldu. Sentyabrın 13-də baş verən keçiddən təşvişə düşən Pekin Berlini təhlükəsizlik risklərini artırmaqda ittiham etməklə yanaşı, beynəlxalq standartlar çərçivəsində hərəkət etdiyini də bəyan edib.
ABŞ Hərbi Dəniz Qüvvələri Böyük Britaniya və Avstraliya kimi müttəfiqləri ilə birlikdə “naviqasiya azadlığını” gücləndirmək üçün müntəzəm olaraq boğazdan tranzit keçirir.
Avstraliya, Hindistan, Yaponiya və ABŞ-dan ibarət “QUAD” qrupunun liderləri Çinlə bağlı ortaq narahatlıqlarına görə keçən həftə Asiya sularında birgə təhlükəsizlik addımlarını genişləndiriblər.
