Xəzər dənizinin cənub-qərbində yerləşən, unikal ekosistemi ilə fərqlənən Qızılağac Milli Parkının yaranması günü ilə əlaqədar sentyabrın 26-da milli parkda “açıq qapı” günü keçiriləcək və ziyarətçilər giriş haqqından azad olunacaq.
“Ümumdünya Dəniz Günü”nə təsadüf edən bu tarixdə Lənkəran, Masallı və Neftçala rayonlarını əhatə edən, zəngin təbii landşafta, özünəməxsus ekosistemə malik olan və ölkənin ən böyük ornitoloji məkanı kimi tanınan Qızılağac Milli Parkında maraqlı tədbir keçiriləcək.
Qeyd edək ki, Qızılağac Milli Parkı ətraf mühitin mühafizəsi, bioloji müxtəlifliyin qorunub saxlanılması, təbii resurslardan səmərəli istifadə və ekoturizmin inkişaf etdirilməsi məqsədilə Azərbaycan Respublikası Prezidentinin 2018-ci il 26 sentyabr tarixli Sərəncamı ilə yaradılıb.
