Türkiyə Böyük Millət Məclisinin sədri Numan Kurtulmuş Rusiya Federasiya Şurasının sədri Valentina Matviyenkonun dəvəti ilə Rusiyaya rəsmi səfər edəcək.
Türkiyə Böyük Millət Məclisindən verilən açıqlamada Numan Kurtulmuşun 23-26 sentyabr tarixləri arasında Rusiyada səfərdə olacağı bildirilib.
Numan Kurtulmuş səfər çərçivəsində ilk olaraq paytaxt Moskvadakı Yunus Əmrə İnstitutuna baş çəkəcək və oradakı tələbələrlə görüşəcək.
Numan Kurtulmuşun Rusiya-Türkiyə İş Adamları Dərnəyinin üzvlərini Türkiyənin Rusiyadakı səfirliyində qəbul edəcəyi bildirilir. Görüşdə iki ölkə arasındakı ticari əməkdaşlıq imkanlarını, iqtisadi-sosial əlaqələrin inkişafına töhfə verəcək mövzular qiymətləndiriləcək.
Türkiyə Böyük Millət Məclisinin sədri Kurtulmuş sentyabrın 24-də Rusiya parlamentinin yuxarı palatası Federasiya Şurasının sədri Valentina Matviyenko ilə nümayəndə heyətləri arasında keçiriləcək görüşə sədrlik edəcək. Həmin gün o, Rusiya Xarici İşlər Nazirliyinin Diplomatik Akademiyasına da baş çəkəcək və burada çıxış edəcək.
Numan Kurtulmuş sentyabrın 25-də Rusiya parlamentinin yuxarı palatası Federasiya Şurasının Baş Assambleyasında çıxış edəcək. Daha sonra, Rusiya parlamentinin aşağı palatası Dövlət Dumasına baş çəkərək, Dövlət Dumasının sədri Vyaçeslav Volodin ilə görüş keçirəcək.
Səfər çərçivəsində Numan Kurtulmuşun Rusiya prezidenti Vladimir Putin ilə də görüşməsi gözlənilir.
